لندن (سب نیوز )ڈیفنس اینڈ سیکیورٹی ایکوپمنٹ انٹرنیشنل ایکسپو 2025میں شرکت کرنے والے سعودی پویلین کا برطانیہ کے دارالحکومت لندن میں باضابطہ افتتاح کر دیا گیا ۔ جنرل اتھارٹی فار ملٹری انڈسٹریز کے زیر اہتمام یہ نمائش 9 سے 12 ستمبر تک جاری رہے گی اور اس میں متعدد سرکاری اور نجی شعبے کے ادارے شریک ہیں ، یہ تقریب فوجی اور سیکورٹی صنعت میں عالمی رہنمائو ں کوایک پلیٹ فارم پر اکٹھا کرنے اور باہمی تعلقات کو مضبوط کرنے، مہارت کے تبادلے اور فوجی ٹیکنالوجی میں جدید ترین پیش رفت کا موقع فراہم کرتی ہے ۔
سعودی پویلین کا افتتاح گورنر جنرل اتھارٹی فار ملٹری انڈسٹریز احمد بن عبدالعزیز ال اوہالی نے نیشنل گارڈ کے نائب وزیر ڈاکٹر ناصر بن عبدالعزیز الداد، چیف آف جنرل سٹاف، لیفٹیننٹ جنرل فیاض بن حمید الرویلی و دیگر نے کیا ۔اس موقع پر جنرل اتھارٹی فار ملٹری انڈسٹریزکے بورڈ آف ڈائریکٹرز کے ممبر بندر بن سلمان السدیری، برطانیہ میں سعودی سفارت خانے کے چارج ڈی افیئرز،مختلف کمپنیوں کے سی ای اوز کے علاوہ دنیا بھر سے اعلی فوجی حکام، ماہرین بھی موجود تھے ۔ افتتاحی تقریب کے موقع پر مہمانوں کو جدید ترین قومی مصنوعات، فوجی صنعتی صلاحیتوں اور نمائش کے لیے جدید ٹیکنالوجی کے بارے میں بریفنگ دی گئی۔
جی اے ایم آئی کے گورنر احمد بن عبدالعزیز ال اوہالی نے اپنے خطاب میں کہا کہ ڈیفنس اینڈ سیکیورٹی ایکوپمنٹ انٹرنیشنل ایکسپو میں سعودی عرب کی شرکت فوجی صنعتوں کے لیے ایک اہم علاقائی مرکز کے طور پر بین الاقوامی شراکت داری کو فعال کرنے کیلئے اہم ہے، سعودی حکومت 2030تک فوجی سازوسامان اور خدمات پر سرکاری اخراجات کا 50فیصد خرچ کرے گی ۔انہوں نے کہا کہ سعودی پویلین جدید دفاعی مصنوعات اور ٹیکنالوجیز تیار کرنے میں قومی کمپنیوں کی پیشرفت کو ظاہر کرنے کے لیے ایک اسٹریٹجک پلیٹ فارم فراہم کرتا ہے، سعودی عرب علاقائی اور بین الاقوامی سلامتی اور استحکام کے حصول کیلئے بین الاقوامی شراکت داروں کے ساتھ تعاون بڑھانے کیلئے پرعزم ہے ۔
