بجلی 10 روپے فی یونٹ سستی کرنے کیلئے حکومت کا مختلف آپشنز پر کام جاری

اسلام آباد:وفاقی حکومت نے بجلی کے نرخوں میں کمی کیلئے اقدامات تیز کرنے کا فیصلہ کیا ہے، ذرائع کے مطابق بجلی کے نرخوں میں کمی کیلئے مختلف آپشنز پر کام جاری ہے۔
میڈیا رپورٹس کے مطابق پانچ آئی پی پیز سے معاہدے ختم کر دئیے گئے ہیں، جس سے حکومت کو 411 ارب روپے کی بچت ہوگی، یہ بچت سالانہ 70 ارب روپے بنے گی۔
ذرائع کے مطابق بگاس کے 8 پاور پلانٹس کا ٹیرف تبدیل ہونے سے 238 ارب روپے کی بچت ہوگی، مزید 16 آئی پی پیز سے معاہدوں کے نتیجے میں 481 ارب روپے کا فائدہ ہوگا۔
حکام کا کہنا ہے کہ آئی پی پیز معاہدوں کے خاتمے یا ان میں تبدیلی کا فائدہ صارفین کو دیا جائے گا۔
اس کے علاوہ بجلی کے بلوں پر ٹیکسز کا بوجھ کم کرنے کی بھی تجویز زیر غور ہے، وفاقی حکومت سالانہ 800 ارب روپے سے زائد بجلی بلوں پر ٹیکسوں سے حاصل کرتی ہے۔
ذرائع کا کہنا ہے کہ ان تمام اقدامات سے حکومت 10 روپے فی یونٹ تک بجلی سستی کرنا چاہتی ہے۔