لاہور:لاہورہائیکورٹ نے لاہورکے ماسٹر پلان 2050 کا نوٹیفکیشن کالعدم قرار دے دیا۔عدالت نے ایل ڈی اے کو نامکمل ماسٹر پلان کے مرحلے کو مکمل کرنے کی ہدایت کردی جبکہ ماسٹر پلان کا ڈرافٹ مکمل کرنے اور نظر ثانی کیلئے اربن یونٹ بھجوانے کا حکم دے دیا۔
جسٹس شاہد کریم نے شہری عبد الرحمان سمیت دیگر کی درخواستوں پر سماعت کی۔ دوران سماعت اربن یونٹ کے کنسلٹنٹ نے عدالت کو بتایا کہ ماسٹر پلان 2050 میں اہم پوائنٹس کو نظر انداز کیا گیا اور قانونی طریقہ کار سے ہٹ کر منظوری دی گئی۔ عدالت نے کارروائی کرتے ہوئے ماسٹر پلان 2050 کا نوٹیفکیشن کالعدم قراردے دیا۔ عدالت نے اربن یونٹ کو نظر ثانی کے بعد اپنی رپورٹ عدالت پیش کرنے کا حکم بھی دیا۔ ریمارکس دیے ماسٹر پلان قانون کے مطابق حکومت منظور کرے گی۔ عدالت نے درخواستوں پرمزید کارروائی ستمبرتک ملتوی کردی۔
