فواد چودھری کی پی ٹی آئی میں واپسی کا راستہ بند چکا ہے، شبلی فراز

اسلام آباد:پاکستان تحریک انصاف ( پی ٹی آئی ) کے رہنما اور سینیٹ میں قائد حزب اختلاف شبلی فراز نے کہا ہے کہ سابق وفاقی وزیر فواد چودھری کی پی ٹی آئی میں واپسی کا راستہ بند چکا ہے۔
تفصیلات کے مطابق جمعہ کہ چیئرمین سینیٹ یوسف رضا گیلانی سے قائد حزب اختلاف شبلی فراز نے ملاقات کی جس کے حوالے سے انہوں نے بتایا کہ ملاقات میں پارلیمانی امور اور ملکی سیاسی صورتحال پر تبادلہ خیال اور سینیٹر اعجاز چوہدری کے پروڈکشن آرڈر جاری کرنے کا مطالبہ کیا ہے۔
قائد حزب اختلاف کا کہنا تھا کہ پی ٹی آئی میں گروپ بندی کی باتیں درست نہیں، سیاسی جماعتوں میں مختلف مزاج کے لوگ ہوتے ہیں، شاندانہ گلزار کے بیان پر کوئی تبصرہ نہیں کرنا چاہتا، شہریار آفریدی جذبانی ہے لیکن پارٹی کا دیرینہ کارکن ہے، شہریار آفریدی کی پارٹی کےلیے بہت قربانیاں ہیں۔
شبلی فراز کا کہنا تھا کہ سیکرٹری جنرل کا منصب پارٹی میں سب سے مشکل عہدہ ہوتا ہے، پارٹی سیکرٹری جنرل کے حوالے سے فیصلہ بانی پی ٹی آئی کریں گے۔
ان کا کہنا تھا کہ بانی پی ٹی آئی کی رہائی کیلئے جو ممکن ہے کر رہے ہیں، ہمارے لیے دو ہی راستے ہیں سڑکیں اور عدالتیں یا پارلیمنٹ ، فواد چوہدری کی پی ٹی آئی میں واپسی کا راستہ بند ہوچکا ہے، بانی پی ٹی آئی کا کہنا ہے شکر ہے فواد چوہدری جیسے لوگ پارٹی چھوڑ گئے تھے۔
انہوں نے مزید کہا کہ پنجاب میں جو آمریت ہے وہ کہیں اور نہیں ہے، پی ٹی آئی تمام چیلنجز کا مقابلہ کرے گی۔