اسلام آباد(سب نیوز)چیئرمین سی ڈی اے و چیف کمشنر اسلام آباد محمد علی رندھاوا کی ہدایت پر وفاقی دارالحکومت اسلام آباد میں بلا تفریق تجاوزات و غیر قانونی تعمیرات کے خاتمے کیلئے بھرپور انسداد تجاوزات آپریشن کیا جا رہے ہیں۔ اس سلسلے میں ہفتہ وار تعطیل کے باوجود سی ڈی اے کے انفورسمنٹ ڈائریکٹوریٹ نے ضلعی انتظامیہ اور اسلام آباد پولیس کے تعاون سے اسلام آباد کے سیکٹرایچ 9اورآئی 9میں سرکاری اراضی بلخصوص گرین بیلٹس پر قائم متعدد غیرقانونی دکانوں، چھپر ہوٹلوں اور مکانات کے خلاف بڑے پیمانے پر کارروائی کرتے ہوئے بھاری مشینری کا استعمال کرتے ہوئے غیر قانونی تعمیرات کو مسمار کردیا۔
آپریشن کی نگرانی ڈپٹی ڈائریکٹر جنرل (انفورسمنٹ)ڈاکٹر انم فاطمہ نے خود کی۔ تفصیلات کے مطابق ان کارروائیوں کے دوران قبضہ مافیا کی سامان سے لدی ہوئی چار ٹرالیوں کو ڈی ایم اے اسٹور منتقل کیا گیا جبکہ بھاری مشینری کی مدد سے 7 دکانیں، 9 چھپر ہوٹل، 7 کمرے، 7 تندور، 4 غسل خانے، 3 ماربل اسٹالز، 3 کنٹینر ، 3 شیڈ، ایک سروس سٹیشن اور ایک غیر فعال گاڑی، لفٹرز، کرینز اور دیگر گاڑیاں ہٹا دی گئیں۔ ان کارروائیوں کے بعد واگزار کرائی گئی سرکاری اراضی کو انوائرمنٹ ونگ کے حوالے کیا جائے گا تاکہ وہاں ماحول دوست شجرکاری کو یقینی بنایا جاسکے۔واضح رہے چیئرمین سی ڈی اے و چیف کمشنر اسلام آباد محمد علی رندھاوا کی ہدایت پر وفاقی دارالحکومت اسلام آباد سے ہر قسم کی تجاوزات و غیر قانونی تعمیرات کو ہٹانے کیلئے تسلسل کے ساتھ ان کارروائیوں کا سلسلہ آئندہ دنوں میں بھی جاری رہے گا تاکہ تاکہ عوامی مقامات اور گذرگاہوں کو شہریوں کیلئے مکمل طور پر کھلا رکھا جاسکے۔چیئرمین سی ڈی اے نے کہا کہ انسداد تجاوزات مہم دارالحکومت اسلام آباد کو غیر مجاز قبضوں اور غیر قانونی تعمیرات سے پاک کرنے کے وژن کا حصہ ہے اور اس سلسلے میں آئندہ دنوں میں بھی مزید کارروائیاں جاری رکھی جائیں گی۔ اس موقع پر سی ڈی اے انتظامیہ نے شہریوں سے اپیل کرتے ہوئے کہا کہ وہ غیر قانونی تعمیرات کرنے سے گریز کریں اور شہر کی قدرتی خوبصورتی کو برقرار رکھنے میں اپنا مثبت کردار ادا کریں۔
