اسلام آباد(آئی پی ایس )صوبائی وزیر پنجاب خواجہ عمران نزیر کی زیر صدارت جڑواں شہروں میں ڈینگی کے حوالے سے جائزہ اجلاس سی ڈی اے ہیڈکوارٹرز میں منعقد ہوا۔ اجلاس میں چیئرمین سی ڈی اے و چیف کمشنر اسلام آباد محمد علی رندھاوا، ڈپٹی کمشنر اسلام آباد عرفان نواز میمن،ڈی سی راولپنڈی حسن وقار چیمہ، ڈی جی ہیلتھ سروسز ایم سی آئی، راولپنڈی انتظامیہ سمیت متعلقہ افسران نے شرکت کی جبکہ ایگزیکٹوڈائریکٹرپمز، ڈپٹی کمشنر مری سمیت وفاقی وزارت صحت کے افسران بذریعہ زوم اجلاس میں شریک ہوئے۔
اجلاس میں صوبائی وزیر صحت کوجڑواں شہروں میں ڈینگی کی موجودہ صورتحال، سرویلنس سرگرمیوں اور احتیاطی تدابیر کے حوالے سے بریفنگ دی گئی۔صوبائی وزیر کو بریفنگ دیتے ہوئے بتایا گیا کہ رواں سال اسلام آباد راولپنڈی میں ڈینگی کے باعث کوئی موت واقع نہیں ہوئی اورڈینگی کے مریضوں کی تعداد میں بتدریج روزانہ کمی ریکارڈ کی جارہی ہے۔گزشتہ 24 گھنٹوں کے دوران راولپنڈی میں ڈینگی کے 13جبکہ اسلام آباد میں ڈینگی کے 25 کیسز رپورٹ ہوئے۔ اس حوالے سے دونوں شہروں کی انتظا میہ نے مل کر مربوط رابطے کو یقینی بنا کر ڈینگی کو بڑے پیمانے پر پھیلنے نہیں دیاجسکی بدولت اب تک رپورٹ کئے گئے ڈینگی کیسز کی شرح پچھلے سال کی نسبت کم ہے۔ اجلاس میں بتایا گیا کہ جڑواں شہروں کے سرکاری ہسپتالوں میں ڈینگی کے مریضوں کیلئے مناسب بیڈز کا بندوبست اور وافر مقدار میں ٹیسٹ کٹس، ادویات سمیت دیگر سہولیات میسر ہیں۔ اس موقع پر صوبائی وزیر برائے صحت پنجاب خواجہ عمران نذیر نے جڑواں شہروں کی انتظامیہ کو بانڈری ایریاز میں کوارڈینیشن کو مزید بہتر بنانے کی ہدایت کرتے ہوئے کہا کہ متعلقہ انتظامیہ ہاٹ اسپاٹ ایریاز کی کڑی نگرانی کو ہر حال میں یقینی بنائیں
اس موقع پر انھوں نے اسلام آباد میں ڈینگی کے تدارک کے لئے کیے موثر اقدامات کرنے پر چئیرمین سی ڈی اے اور ڈپٹی کمشنرز اسلام آباد و راولپندی کی کاوشوں کو سراہا۔اجلاس میں چیئرمین سی ڈی اے و چیف کمشنرمحمد علی رندھاوانے کہا کہ ڈینگی کے حوالے سے عوام الناس بالخصوص بزرگوں اور بچوں میں باقاعدہ احتیاطی تدابیر کی آگہی پیدا کی جائے۔ اس ضمن میں مساجد، تعلیمی اداروں، اور کمیونٹی سینٹرز میں معلوماتی سیشنز اور آگاہی مہمات کا اہتمام کیا جائے تاکہ عوام کو صفائی، مچھروں کی افزائش روکنے، اور بروقت علاج کے حوالے سے مکمل رہنمائی فراہم ہو۔دونوں شہروں کی انتظامیہ ڈینگی کے خاتمے کے لیے ایک ٹیم کے طور پر اپنے فرائض سر انجام دے رہی ہیں، اور اس مقصد کے لیے صفائی مہم، اسپرے مہم، اور نکاسی آب کے نظام کی بہتری پر خصوصی توجہ دی جا رہی ہے۔اس حوالے سے تمام متعلقہ محکموں کے درمیان باہمی رابطہ اور روزانہ کی بنیاد پر جائزہ اجلاس منعقد کیے جائیں تاکہ ڈینگی کے پھیلا پر موثر قابو پایا جا سکے۔
