جدہ (خالد نواز چیمہ)
پاکستان قونصلیٹ جدہ کے کمرشل قونصلر اور صدر پاکستان انویسٹر فورم جدہ چوہدری محمد شفقت محمود نے جدہ اور مغربی ریجن میں مقیم تمام پاکستانی کاروباری شخصیات، صنعتکاروں اور سرمایہ کاروں کو خراجِ تحسین پیش کرتے ہوئے ان کی خدمات کو سراہا ہے۔ انہوں نے کہا کہ سعودی عرب میں پاکستانی بزنس کمیونٹی نے ہمیشہ ملک و قوم کا نام روشن کیا ہے اور معیشت کے فروغ میں نمایاں کردار ادا کیا ہے۔
انہوں نے اعلان کیا کہ پاکستان انویسٹر فورم جدہ (PIFJ) کے انتخابات قریب آ چکے ہیں، اس لیے تمام ارکان اور نئے سرمایہ کار حضرات اپنی ریجسٹریشن جلد از جلد مکمل کریں۔
ریجسٹریشن کے لیے پاکستان قونصلیٹ جدہ کے کمرشل سیکشن کی جانب سے ایک جدید ڈیجٹل سسٹم متعارف کروایا گیا ہے، جو قونصل جنرل جناب خالد مجید صاحب کی براہ راست رہنمائی اور سرپرستی میں تشکیل دیا گیا ہے۔
رجسٹریشن فارم 30 اکتوبر 2025 تک ویب سائٹ
🔹 Pifjmembership.org
پر دستیاب ہے، جہاں تمام بزنس پرسنز اپنی معلومات درج کر کے بآسانی ممبرشپ حاصل کر سکتے ہیں۔
پاکستان انویسٹر فورم جدہ ایک ایسا پلیٹ فارم ہے جو سعودی عرب میں مقیم پاکستانی سرمایہ کاروں کو متحد کرتا ہے، ان کے کاروباری مفادات کا تحفظ کرتا ہے اور پاکستان میں سرمایہ کاری کے نئے مواقع پیدا کرنے میں معاون بنتا ہے۔
انہوں نے کہا کہ نومبر کے دوسرے ہفتے میں صدر اور جنرل سیکرٹری کے عہدوں کے لیے نامزدگیاں قبول کی جائیں گی، لہٰذا خواہشمند امیدوار اپنے نام 6 نومبر 2025 تک جمع کروائیں۔
انہوں نے تمام پاکستانی انویسٹرز سے اپیل کی کہ وہ اپنی شمولیت یقینی بنا کر فورم کو مضبوط اور فعال بنائیں تاکہ پاکستانی کاروباری برادری کی آواز مؤثر انداز میں سنی جا سکے۔
آخر میں انہوں نے یقین دہانی کرائی کہ تمام فراہم کردہ ڈیٹا مکمل طور پر محفوظ رکھا جائے گا اور یہ صرف کمرشل سیکشن پاکستان قونصلیٹ جدہ کی تحویل میں رہے گا
