گردشی قرضہ کم کرنے کیلئے حکومت اور بینکوں کے معاملات طے
سرکلر ڈیٹ سے متعلق فنانسنگ سہولت معاہدے کی تقریب آج وزیر اعظم ہائوس میں ہو گی
وزیراعظم شہبازشریف معاہدے پر دستخط کی تقریب میں ورچوئلی شریک ہوں گے،ذرائع
اسلام آباد (آئی پی ایس )پاور سیکٹر کے سرکلر ڈیٹ کو کم کرنے سے متعلق بڑی پیش رفت سامنے آئی ہے، وفاقی حکومت اور بینکوں کے درمیان فنانسنگ معاہدے کے لیے معاملات طے ہوگئے ہیں۔ سرکلر ڈیٹ سے متعلق فنانسنگ سہولت معاہدے کی تقریب وزیراعظم آفس میں شیڈول ہوگئی، وزیراعظم شہبازشریف معاہدے پر دستخط کی تقریب میں ورچوئلی شریک ہوں گے۔کابینہ نے کمرشل بینکوں سے 1275 ارب روپے قرض لینے کی منظوری دے رکھی ہے، سینٹرل پاور پرچیزنگ ایجنسی نے تقریب میں شرکت کے لیے اسٹیک ہولڈرز اور دیگر حکام کو مدعو کرلیا۔تقریب کے لیے 18 بینکوں اور ڈسکوز سمیت دیگر حکام کو دعوت دی گئی ہے، نائب وزیراعظم اسحق ڈار اور وزیر توانائی اویس لغاری سمیت متعدد وفاقی ورزا تقریب میں شریک ہوں گے۔عالمی مالیاتی فنڈ (آئی ایم ایف) مشن ہیڈ، عالمی بینک اور ایشیائی ترقیاتی بینک (اے ڈی بی) کے کنٹری ڈائریکٹرز کو دعوت دی گئی ہے جب کہ چیئرمین نیپرا اور گورنر اسٹیٹ بینک سمیت دیگر اعلی حکام کو بھی شرکت کی دعوت دی گئی ہے۔سرکاری دستاویز کے مطابق جولائی 2025 تک پاور سیکٹر کے سرکلر ڈیٹ کا حجم 1661 ارب روپے ریکارڈ کیا گیا، جون 2025 تک پاور سیکٹرکا سرکلر ڈیٹ 1614 ارب روپے تھا۔واضح رہے کہ وفاقی کابینہ نے اس سال جون میں پاور سیکٹر کے گردشی قرضوں کے مستقل حل کے لیے تاریخی فیصلہ کرتے ہوئے کمرشل بینکوں سے کم ترین شرح پر 1275ارب روپے قرض لینے کی منظوری دی۔پلان کے تحت 1275 ارب روپے بینکوں سے حاصل کیے جائیں گے، پہلی بار گردشی قرض کے اسٹاک کو ایک سطح پر رکھنے کے پرانے طریقہ کار کے بجائے بینکوں کی مدد سے اسی کو بتدریج ختم کیا جائے گا۔