دریائے راوی کے کنارے غیرقانونی تعمیرات کرنے والوں کے گرد شکنجہ سخت ،نجی ہائوسنگ سوسائٹی کا مالک گرفتار

لاہور(سب نیوز) پنجاب کے محکمہ اینٹی کرپشن نے حالیہ سیلاب کے بعد دریائے راوی کے اطراف غیرقانونی ہاوسنگ اسکیموں کے خلاف کریک ڈاون تیزکردیا ہے۔اس سلسلے میں ایک بڑی کارروائی کے دوران 11ہزارکنال پرقائم ایک غیرقانونی ہاوسنگ اسکیم کے مالک کو گرفتارکرلیا گیا ہے۔
ڈائریکٹرجنرل اینٹی کرپشن سہیل ظفرچٹھہ نے انکشاف کیا کہ گرفتارملزم پر8 ارب روپے دبئی منتقل کرنے کا الزام ہے جبکہ اس منصوبے میں لاہورڈویلپمنٹ اتھارٹی (ایل ڈی اے)کے بعض افسران کی مبینہ ملی بھگت بھی سامنے آئی ہے۔ڈی جی اینٹی کرپشن کے مطابق روڈا اورایل ڈی اے کو سمن جاری کرتے ہوئے تمام متعلقہ ہاوسنگ اسکیموں کا ریکارڈ طلب کرلیا گیا ہے۔
دریائے راوی کے اطراف بننے والی اسکیموں کی تفصیلات بھی حاصل کی جا رہی ہیں تاکہ سیلابی تباہ کاریوں کی وجوہات اورذمہ داروں کا تعین کیا جا سکے۔انہوں نے مزید کہا کہ وزیراعلی مریم نوازکے وژن کے مطابق کرپشن میں ملوث کسی سرکاری افسرکورعایت نہیں دی جائے گی، تحقیقات کا دائرہ مزید وسیع کردیا گیا ہے اورعوام کو لوٹنے والے عناصرسے ریکوری کی جائے گی۔سہیل ظفر چٹھہ کا کہنا تھا کہ سادہ لوح شہریوں کوان غیرقانونی اسکیموں سے واپس رقم دلوانا بھی ترجیح ہے۔