راولپنڈی اور مری میں ڈینگی کے وار جاری، 24گھنٹوں میں 11نئے کیسز رپورٹ

اسلام آباد (سب نیوز)راولپنڈی اور مری میں ڈینگی وائرس کے کیسز میں مسلسل اضافہ دیکھنے میں آ رہا ہے۔محکمہ صحت کی جانب سے جاری کردہ رپورٹ کے مطابق گزشتہ 24 گھنٹوں کے دوران راولپنڈی میں ڈینگی کے 7 نئے کیسزجبکہ مری میں 4 کیسز رپورٹ ہوئے ہیں، ان دونوں علاقوں میں ایک دن میں 11 نئے مریض سامنے آئے ہیں۔
حکام کے مطابق رواں سیزن میں راولپنڈی سے ڈینگی وائرس کے کل 159 کیسز رپورٹ ہو چکے ہیں جبکہ مری سے 81 افراد ڈینگی کا شکار ہو چکے ہیں۔موجودہ صورتحال کے پیش نظر ضلعی انتظامیہ اور محکمہ صحت نے الرٹ جاری کردیا ہے اورانسدادِ ڈینگی ٹیمیں متحرک کردی گئی ہیں۔رپورٹ کے مطابق اس وقت راولپنڈی کے مختلف سرکاری و نجی اسپتالوں میں 92 مریض زیر علاج ہیں جبکہ مری کے 25 مریض مختلف اسپتالوں میں داخل ہیں۔
محکمہ صحت نے شہریوں سے اپیل کی ہے کہ وہ گھروں میں پانی جمع نہ ہونے دیں، صفائی کا خاص خیال رکھیں اور فوری طور پرکسی بھی مشتبہ علامات کی صورت میں اسپتال سے رجوع کریں۔ماہرین صحت نے خبردارکیا ہے کہ اگلے چند ہفتے ڈینگی کے پھیلاو کے لیے نہایت حساس ہیں لہذا احتیاطی تدابیر اپنائی جائیں۔