سیلاب متاثرین کی امداد اجتماعی کام، نمبر بنانے کی ضرورت نہیں، چیئرمین سینیٹ

ملتان (سب نیوز)چیئرمین سینیٹ یوسف رضا گیلانی نے کہا ہے کہ سیلاب متاثرین کی امداد اجتماعی کام ہے نمبر بنانے کی ضرورت نہیں۔
اپنے آبائی شہر ملتان میں سینیٹ یوسف رضا گیلانی کا میڈیا سے گفتگو کرتے ہوئے کہنا تھا کہ آج کا دن سب سے زیادہ خطرناک ہے، لوگوں کونکالنے کیلئے انتظامیہ متحرک ہے۔
انہوں نے کہا کہ دریا کے قریب رہنے والے تمام افراد محفوظ مقام پرمنتقل ہوجائیں، سیلاب متاثرہ علاقوں میں کیمپ لگائے گئے ہیں،اِس مشکل وقت میں عوام کو تنہا نہیں چھوڑیں گے۔چیئرمین سینیٹ کا کہنا تھا کہ ہمیں تنقید کے بجائے قومی یکجہتی کا مظاہرہ کرنا ہوگا،ہم مل کر ایک ٹیم کی طرح کام کررہے ہیں، یہ اجتماعی کام ہے اِس میں نمبر بنانے کی ضرورت نہیں ۔
یوسف رضا گیلانی کا مزید کہنا تھا کہ ملک اِس وقت مشکل حالات سے گزر رہا ہے، وزیراعلی پنجاب متاثرہ علاقوں کے فلڈ کیمپس کا دورہ کررہی ہیں، جب کہ امدادی ٹیمیں متاثرین کو ریسکیو کرنے میں مصروف ہیں۔