لاہور(آئی پی ایس )وفاقی وزیر داخلہ محسن نقوی نے تبلیغی جماعت کے مرکز رائیونڈ کا دورہ کیا۔وفاقی وزیر داخلہ محسن نقوی نے تبلیغی جماعت کے اکابرین مولانا محمد احمد بٹلر، مولانا عبید اللہ خورشید، ڈاکٹر سلیم اور دیگر شخصیات سے ملاقات کی۔انوار غنی،میاں احسن،ڈاکٹر ندیم اشرف ، مولانا عامر احسان ،مولانا امجد فاروق،شبیر احمد عثمانی،مفتی عرفان اور بریگیڈئر( ر)مصدق بھی اس موقع پر موجود تھے۔
ملاقات میں تبلیغی جماعت کے اکابرین نے وزیر داخلہ کو نومبر میں ہونے والے عالمی تبلیغی اجتماع کے انتظامات سے آگاہ کیا۔محسن نقوی نے تبلیغی جماعت کی دین اسلام کیلئے خدمات کو سراہتے ہوئے کہا کہ وہ بیرون ممالک سے آنے والے وفود کیلئے ہر ممکن تعاون فراہم کریں گے اور جہاں بھی ویزے کا مسئلہ درپیش آیا، اسے ترجیحی بنیادوں پر حل کرایا جائے گا۔ یہ مہمان ہمارے لئے معزز ہیں اور ان کیلئے ہر سطح پر آسانیاں پیدا کی جائیں گی، وہ ہر سال باقاعدگی سے تبلیغی اجتماع میں شرکت کرتے ہیں اور انشا اللہ رواں برس بھی آئیں گے۔
محسن نقوی نے اس موقع پر دعا کی کہ اللہ تعالی اجتماع کے منتظمین کو نیک کام جاری رکھنے کا اجر دے۔اس موقع پر مولانا محمد احمد بٹلر نے کہا کہ سب نے اللہ تعالی کی جانب لوٹ جانا ہے اور ہمیں دین اسلام اور انسانیت کی خدمت کو اپنا شعار بنانا چاہیے، اللہ پاک کے بتائے ہوئے راستے پر چلنے میں ہی بھلائی اور کامیابی ہے۔
