اسلام آباد(آئی پی ایس) پاکستان فوج کے ترجمان لیفٹیننٹ جنرل احمد شریف نے چند روز قبل دعویٰ کیا تھا کہ فیلڈ مارشل عاصم منیر نے حالیہ عرصے کے دوران کسی صحافی کو کوئی انٹرویو نہیں دیا اور ان کے بیان سے منسوب کالم من گھڑت ہے۔
ڈی جی آئی ایس پی آر کے حالیہ بیان پر معروف سینئر صحافی اور تجزیہ نگار سہیل وڑائچ نے سوشل میڈیا پلیٹ فارم ایکس (سابقہ ٹوئٹر) پر ایک تفصیلی وضاحت جاری کی ہے۔
سینئر صحافی نے ایکس پوسٹ میں لکھا کہ جناب احمد شریف چوہدری کا میرے دل میں ذاتی احترام ہے، ذاتی ملاقاتوں میں وہ بہت خوش گوار ہیں مگر انہوں نے جن باتوں کی تردید کی، ان کا ذکر مذکورہ کالم میں نہیں تھا، شاید انہوں نے غلط فہمی کی بنیاد پر بات کی کہ اس کالم میں میرا کوئی ذاتی فائدہ ہو سکتا ہے؟؟ اگر اس حوالے سے کوئی سوال اب بھی موجود ہے تو میں اس کی وضاحت کے لیے ہمیشہ حاضر ہوں۔
سہیل وڑائچ نے لکھا کہ انہوں نے مستند طور پر فرمایا کہ فیلڈ مارشل نے کوئی انٹرویو نہیں دیا، میرے پورے کالم کو دوبارہ پڑھ لیں اس میں کہیں لفظ انٹرویو استعمال ہی نہیں ہوا۔ میرے کالم کا عنوان ہی پہلی ملاقات ہے نہ کچھ اس سے زیادہ نہ اس سے کم۔
انہوں نے وضاحتی پوسٹ میں لکھا کہ میں نے کہیں نہیں لکھا یہ ون ٹو ون ملاقات تھی۔ جس تقریب میں آٹھ سو حاضرین موجود تھے، نہ تو وہاں اور نہ ہی چند لوگوں کے سامنے کھانے پر ہونے والی گفتگو آف دی ریکارڈ تھی۔
انہوں نے یہ بھی وضاحت کرتے ہوئے لکھا کہ نو مئی، عمران خان اور معافی کے حوالے سے بھی وہاں کوئی بات نہیں ہوئی۔ براہ کرم اس کالم کو دوبارہ پڑھ لیں، اس میں سرے سے نو مئی، عمران خان اور ان کی معافی کا کوئی ذکر موجود نہیں۔
سینئر صحافی سہیل وڑائچ نے مزید لکھا کہ میں نے صرف ایک فقرہ لکھا کہ سیاسی مصالحت کے حوالے سے انہوں نے قرآن کی آیات اور ان کا ترجمہ پیش کیا، اب لوگوں اور ٹرولرز نے اس سے کیا تاثر لیا، وہ ان کی مرضی ہے۔ گویا جن پوائنٹس کی اتنے بڑے پیمانے پر تردید کی گئی، ان کا تو ذکر فسانے میں کہیں تھا ہی نہیں۔ کسی کے اپنے ذہن میں ہو تو وہ اس کی مرضی پر منحصر ہے۔
واضح رہے کہ سینئر صحافی سہیل وڑائچ نے سولہ اگست کو جنگ اخبار میں شائع اپنے کالم میں دعویٰ کیا تھا کہ برسلز میں ان کی آرمی چیف سے پہلی ملاقات ہوئی تھی جس میں انہوں نے سربراہ پاک فوج سے کھردرے سوالات کیے جن کے انہوں نے واضح اور شفاف جوابات دیے۔
بعد ازاں 21 اگست بروز جمعرات پاکستان فوج کے ترجمان لیفٹیننٹ جنرل احمد شریف نے اسلام آباد میں تقریب سے خطاب کے بعد صحافیوں سے گفتگو کے دوران اس بات کی تردید کرتے ہوئے کہا تھا کہ فیلڈ مارشل عاصم منیر نے حالیہ عرصے کے دوران کسی صحافی کو کوئی انٹرویو نہیں دیا اور ان کے بیان سے منسوب کالم من گھڑت ہے۔
فوجی ترجمان کا کہنا تھا کہ بیلجئم کے دارالحکومت برسلز میں آرمی چیف سے ملاقات کے دوران سیکڑوں لوگوں نے تصاویر بنوائیں لیکن ایک سینئر صحافی نے ذاتی مفاد اور تشہیر حاصل کرنے کی کوشش کی۔
