اسلام آباد(آئی پی ایس )چیئرمین کیپیٹل ڈویلپمنٹ اتھارٹی و چیف کمشنر اسلام آباد محمد علی رندھاوا کی زیر صدارت سی ڈی اے ہیڈکوارٹرز میں غیر قانونی طور پر مقیم غیر ملکی افراد کے خلاف کارروائی اور متعلقہ اداروں کے درمیان ہم آہنگی کو یقینی بنانے کیلئے خصوصی ٹاسک فورس کا اجلاس منعقد ہوا۔ اجلاس میں شامل ٹاسک فورس کے ممبران اسلام آباد، راولپنڈی، اٹک، مری اور ہری پور کی ضلعی انتظامیہ اور پولیس افسران پر مشتمل سمیت وزارت داخلہ، نادرہ، ایف آئی اے، سی ٹی ڈی، چیف کمشنریٹ افغان رفیوجیز سمیت سنیئر افسران نے شرکت کی۔
اجلاس میں اسلام آباد، راولپنڈی سمیت اٹک، مری اور ہری پور کے اضلاع میں بغیر ویزے کے حامل غیر ملکی مقیم افراد کے خلاف ایکشن لینے کا فیصلہ کیا گیا۔ چیئرمین سی ڈی اے محمد علی رندھاوا و چیف کمشنر اسلام آباد نے ہدایت کی کہ غیر ملکی افراد جو غیر قانونی طور پر مقیم ہیں انکی مستقبل میں دوبارہ آبادکاری کو روکنے کیلئے ایک جامع پلان تشکیل دیا جائے۔ انہوں نے کہا کہ غیر ملکی افراد جو غیر قانونی طور پر مقیم ہیں کی دوبارہ آبادکاری کو روکنے کیلئے ایک مربوط ڈیٹا بیس تیار کیا جائے، جس میں ان افراد کی مکمل معلومات، رہائشی پتے اور دیگر اہم تفصیلات درج ہوں۔
چیئرمین سی ڈی اے نے 5 اضلاع کو سیف زون بنانے کیلئے ایف آئی اے، نادرا اور دیگر اداروں کے ساتھ ڈیٹا شئیرنگ اور ہم آہنگی بڑھانے کی ہدایت کی۔ علاوہ ازیں، متصل علاقوں میں بغیر ویزے کے غیر ملکی کی موجودگی پر نظر رکھنے اور ان کے خلاف قانون کے مطابق فوری کارروائی کرنے کی تاکید کی گئی۔ اجلاس میں گھروں اور ہوٹلوں میں غیر ملکی مقیم کرایہ داروں کے طور پر رجسٹرڈ نہ ہونے والے افراد کے خلاف بھی کارروائی یقینی بنانے کا فیصلہ کیا گیا۔چیئرمین سی ڈی اے و چیف کمشنر اسلام آباد نے ہدایت کی کہ متعلقہ اضلاع اور ادروں سے فوکل پرسنز کو مقرر کیا جائے تاکہ غیرقانونی تارکین وطن کے خلاف باہمی کوارڈینیشن کو مزید مثر بنایا جاسکے۔
اس ضمن میں چیئرمین سی ڈی اے و چیف کمشنر اسلام آباد محمد علی رندھاوا نے کہا کہ متعلقہ اداروں کے درمیان ڈیٹا کی ہم آہنگی کو یقینی بنایا جائے تاکہ غیر ملکی افراد ویلڈ ویزے (اجازت نامہ) کے ساتھ قیام کرسکیں بصورت دیگر ان کے خلاف فوری قانونی کارروائی عمل میں لائی جائے۔ چیئرمین سی ڈی اے و چیف کمشنر اسلام آباد کی ہدایت پر تمام متعلقہ ڈپٹی کمشنرز کی جانب سے غیر ملکی افراد جو ویزے کے بغیر قیام پزیر ہیں ان افراد کا متعلقہ اضلاع سے فورا ڈیٹا اکٹھا کیا جائے گا۔
اجلاس میں اتفاق کیا گیا کہ اس سلسلہ میں غیر ملکی افراد جو غیر قانونی طور پر مقیم ہیں انکو پراپرٹی کے لین دین کے سلسلے میں اسٹامپ پیپر کا اجرا بھی بند کیا جائے اور قانونی کرایہ داری ایکٹ کو سختی سے نافذ کرنے کی تاکید کی گئی۔ مزید برآں اجلاس میں فیصلہ کیا گیا کہ پاکستان ٹیلی کمیونیکیشن اتھارٹی (پی ٹی اے) غیر قانونی طور پر مقیم غیر ملکی افراد کو ویلڈ ویزے (اجازت نامے) کے بغیر موبائل سمز بھی جاری نہ کرے۔ چیئرمین سی ڈی اے نے کہا کہ حکومت پاکستان کا عزم ہے کہ غیر قانونی تارکین وطن کے خلاف قانون کے مطابق کارروائی کو مثر بناتے ہوئے ملک کی سلامتی اور استحکام کو یقینی بنایا جائے۔ انہوں نے کہا کہ تمام متعلقہ اداروں کے ساتھ مل کر کام کرتے ہوئے اس مسئلے کے مستقل حل کیلئے بھرپور اقدامات کئے جارہے ہیں۔
