اسلام آباد(سب نیوز)شیعہ علما کونسل پاکستان مرکزی جنرل سیکرٹری علامہ ڈاکٹر شبیر حسن میثمی نے شیعہ ذائرین کے زمینی راستوں کے ذریعے اربعین جانے پر پابندی کیخلاف آج سے ملک بھر میں احتجاج اور دھرنوں کا اعلان کر دیا ہے،وفاقی حکومت زمینی راستوں کی بندش کا فیصلہ واپس لے، حکومت مسلسل ٹال مٹول کا رویہ اپنا کر زائرین کا وقت ضائع کر رہی ہے جس پر مرکزی مجلس عاملہ نے عوامی احتجاج میں جانے کا فیصلہ کیا ہے ملک بھر میں احتجاجی ریلیاں نکالی جائیں گی اور جمعہ کو ملک گیر احتجاجی مظاہرے کئے جائیں گے، اربعین پر جانے والے زائرین کو زمینی راستے فراہم نہ کئے گئے تو عراق میں مشی سے رہ جانے والے زائرین کی پاکستان میں مشی شروع کرنے کا اعلان اور چہلم امام حسین علیہ السلام کے جلوسوں کو احتجاجا” سڑکوں پر روکا جا سکتا ہے،علامہ ڈاکٹر شبیر حسن میثمی ، علامہ عارف واحدی، علامہ رمضان توقیر، علامہ ناظر تقوی، علامہ سبطین سبزواری،زاہد علی آخونزادہ،علامہ مظہر عباس ،علامہ اشتیاق کاظمی،سید ساجد حسین نقوی،سمیت دیگر اراکین مرکزی مجلس عاملہ شیعہ وعلما کونسل نے ان خیالات کا اظہار نیشنل پریس کلب اسلام آباد میں پریس کانفرنس کرتے ہوئے کیا
ان کا مزید کہنا تھا کہ شیعہ علما کونسل پاکستان کی مرکزی مجلس عاملہ کا دو روزہ اجلاس زیر صدارت قائد ملت جعفریہ پاکستان علامہ سید ساجد علی نقوی اسلام آباد میں منعقد ہوا جس میں اربعین کے موقع پر سفر مقدسہ زیارات کے لیے زمینی راستوں کی بندش کے حکومتی فیصلے پر ہونے والے مذاکرات پر غور و خوص کیا گیا اور یہ محسوس کیا گیا کہ حکومت کے ساتھ روابط میں اس اہم مسئلہ کا کوئی خاطر خواہ نتیجہ سامنے نہ آ سکا اور حکومت مسلسل ٹال مٹول کا رویہ اپنا کر زائرین کا وقت ضائع کر رہی ہے ،انہوں نے واضح کیا کہ وفاقی وزیر داخلہ کی طرف سے ٹویٹ کے ذریعے راستوں کی بندش کا فیصلہ آٹھ کروڑ شیعہ عوام کی توہین ہے، پاکستان اس طرح نہیں چلے گا،حکومت کی جانب سے زائرین کے زمینی راستوں کی بندش کے تاخیر سے کیے گئے فیصلے پر حکمرانوں سے مکمل اور تفصیل سے مذاکرات کیے گئے تاہم زائرین کے اہم ترین مسئلہ پر حکومت نے انتہائی غیر سنجیدگی کا مظاہرہ کیا ،حکمرانوں کے اس سنگین مسلے پر غیر سنجیدہ روئیے نے ہمیں مجبور کر دیا کہ ہم اب عوامی حقوق کے حصول کے لیے عوام میں جائیںمرکزی مجلس عاملہ کے فیصلے کے مطابق شیعہ علما کونسل پاکستان نے آج سے ملک گیر احتجاجی تحریک شروع کرنے کا فیصلہ کیا ہے جس کے مطابق کل سے ملک بھر میں احتجاجی ریلیاں نکالی جائیں گی اور جمعہ کو ملک گیر احتجاجی مظاہرے کیے جائیں گے،بعدازاں شیعہ علما کونسل پاکستان کی مرکزی مجلس عاملہ کے اراکین نینیشنل پریس کلب کے باہر احتجاجی مظاہرہ بھی کیا اور حکومت سے مطالبہ کیا کہ وہ فوری طور پر زمینی راستوں کی بندش کا فیصلہ واپس لے۔
