علی امین گنڈا پور منانے میں کامیاب، وقاص اورکزئی سینیٹ الیکشن سے دستبردار

پشاور(سب نیوز)خیبرپختونخوا میں سینیٹ الیکشن سے قبل پاکستان تحریکِ انصاف (پی ٹی آئی)کے کورنگ امیدوار وقاص اورکزئی نے انتخابات سے دستبرداری کا اعلان کر دیا۔
الیکشن سے ایک روز قبل وقاص اورکزئی نے وزیراعلی علی امین گنڈاپور کی موجودگی میں سینیٹ الیکشن میں حصہ نہ لینے کااعلان کرتے ہوئے کہا کہ جہاں عمران خان کی بات ہو وہاں میرے لیے کوئی چیز معنی نہیں رکھتی، تاہم اس کا مطلب یہ نہیں کہ میں کسی دبا میں یہ فیصلہ کر رہا ہوں۔
وزیراعلی خیبر پختونخوا نے اس موقع پر کہا کہ ہمیں فخر ہے کہ پی ٹی آئی ورکرز نے ہمیشہ عمران خان کا نظریہ مقدم رکھا ہے، وقاص اورکزئی نے ایک بار پھر ذاتی مفاد پر بانی کے حکم اور پارٹی کے مفاد کو ترجیح دی اور ہماری درخواست پر سینیٹ کی نشست سے کاغذات واپس لینے پر آمادگی ظاہر کی۔علی امین گنڈاپور نے مزید کہا کہ میں پوری پارٹی کو یہ پیغام دینا چاہتا ہوں کہ ہمارے لیے عمران خان کا حکم اور پارٹی کا مفاد اولین ترجیح ہے، باقی چیزیں بعد میں آتی ہیں۔