فیصل آباد(آئی پی ایس )وزیرمملکت داخلہ طلال چودھری نے کہاہے کہ خیبر پختونخوا کے منتخب اراکین سے حلف نہ لینا توہین عدالت ہے۔ پنجاب کے شہر فیصل آباد میں میڈیا سے گفتگو کرتے ہوئے طلال چودھری کا کہنا تھا کہ فیصل آباد اورجڑانوالہ میں بارشوں کے دوران انتظامیہ متحرک ہے، لوگوں کوجانی ومالی نقصان سے بچایا گیا ہے۔
انہوں نے کہا کہ آج خیبرپختونخوا حکومت اورسپیکر نے عدالتی حکم کوہوا میں اڑایا، منتخب اراکین سے حلف نہ لینا توہین عدالت ہے،آج خیبرپختونخوا اسمبلی میں کورم کا بہانہ بنایا گیا، سپیکرخیبرپختونخوا اسمبلی نے سازش کے تحت ارکان کوحلف برداری سے روکا اور اسمبلی میں کورم کا مسئلہ منصوبہ بندی کے تحت کیا گیا۔وزیر مملکت کا کہنا تھا کہ بانی پی ٹی آئی نے ہمیشہ بولیاں لگوائیں، یہ ارب پتی لوگوں کولاتے ہیں پھر ان کی پارٹی میں ردعمل آتا ہے، خیبرپختونخوا میں ہمیشہ سیٹیں بیچی جاتی ہیں ، سینیٹ کومکمل ہونے سے روکنا بہت بڑا آئینی جرم ہے، طلال چودھری کا مزید کہنا تھا کہ کوہستان پاکستان کی تاریخ کا سب سے بڑا سکینڈل سامنے آیا، سکینڈل کے بینفشری سارے لوگ ان کے اپنے ہیں۔
