چیف جسٹس کا غریب سائلین کو مفت قانونی نمائندگی فراہم کرنے کا اعلان

کوئٹہ (سب نیوز)چیف جسٹس پاکستان جسٹس یحییٰ آفریدی نے غریب سائلین کو مفت قانونی نمائندگی فراہم کرنے کا اعلان کیا ہے جس کے تحت وکلا کو ریاست کی جانب سے 50 ہزار روپے تک معاوضہ دیا جائے گا۔
چیف جسٹس پاکستان جسٹس یحیی آفریدی کی زیر صدارت سپریم کورٹ کوئٹہ رجسٹری برانچ میں ایک اعلی سطحی اجلاس منعقد ہوا جس کے اعلامیے کے مطابق اجلاس میں بار ایسوسی ایشنز اور لا اینڈ جسٹس کمیشن کے درمیان تعاون کا جائزہ لیا گیا اور انصاف کی فراہمی کو بہتر بنانے کے لیے ادارہ جاتی روابط مضبوط کرنے پر غور کیا گیا۔اجلاس میں بلوچستان ہائی کورٹ، سپریم کورٹ بار اور پاکستان بار کونسل کے نمائندوں نے شرکت کی۔
چیف جسٹس نے ہر صوبے میں لا اینڈ جسٹس کمیشن کے نمائندوں کی تعیناتی کا اعلان کیا جو ضلعی بارز میں ترقیاتی منصوبوں کی نگرانی کریں گے۔انہوں نے کم ترقی یافتہ اضلاع میں عدالتی بنیادی ڈھانچے کی کمی پر تشویش کا اظہار کرتے ہوئے ضلعی سطح پر انصاف کے منصوبوں پر موثر عملدرآمد کی ہدایت کی۔چیف جسٹس نے غریب سائلین کو مفت قانونی نمائندگی فراہم کرنے کا اعلان کیا جس کے تحت وکلا کو ریاست کی جانب سے 50 ہزار روپے تک معاوضہ دیا جائے گا۔
قانونی معاونت کا دائرہ کار سپریم کورٹ تک بڑھانے کا فیصلہ بھی کیا گیا۔انہوں نے بارز سے اہل وکلا کے نام نامزد کرنے اور وکلا کی تربیت کے لیے فیڈرل جوڈیشل اکیڈمی کے پروگرامز سے استفادہ کرنے کی ہدایت کی جبکہ تربیتی کیلنڈر کو بارز میں وسیع پیمانے پر تقسیم کرنے کا بھی فیصلہ کیا گیا۔چیف جسٹس نے اعلان کیا کہ کراچی میں ہونے والے اگلے اجلاس میں بارز کے مسائل پر مزید مشاورت کی جائے گی۔