مولانا فضل الرحمان کے بھائی ضیا الرحمان نے علی امین گنڈاپور کا الیکشن لڑنے کا چیلنج قبول کرلیا

اسلام آباد (سب نیوز)جمعیت علمائے اسلام (ف)کے سربراہ مولانا فضل الرحمان کے بھائی انجینئر ضیا الرحمان نے وزیراعلی خیبرپختونخوا علی امین گنڈاپور کا الیکشن لڑنے کا چیلنج قبول کرلیا۔
خیبرپختونخوا میں سیاسی تبدیلی اور سینیٹ الیکشن کے معاملے پر سربراہ جے یو آئی(ف)مولانا فضل الرحمان کے بھائی ضیا الرحمان اور وزیراعلی خیبرپختونخوا علی امین گنڈا پور کے بھائی عمرامین گنڈا پورآمنے سامنے آگئے۔وزیراعلی خیبرپختونخوا علی امین گنڈا پور نے مولانا فضل الرحمان کو الیکشن لڑنے کا چیلنج دیا، جس پر مولانا فضل الرحمان کے بھائی ضیا الرحمان نے الیکشن لڑنے کا چیلنج قبول کرلیا۔
مولانا فضل الرحمان کے چھوٹے بھائی انجینئر ضیا الرحمان نے اپنے ویڈیو بیان میں کہا کہ علی امین گنڈا پور تمہارا چیلنج قبول ہے، تمہاری اوقات نہیں کہ مولانا فضل الرحمان تمہارا چیلنج قبول کرے۔انجینئر ضیا الرحمان نے علی امین گنڈا پور کو مخاطب کرتے ہوئے کہا کہ پہلے تم مفتی محمود کے اس بیٹے سے مقابلہ کرکے دکھاو، مولانا فضل الرحمان نے تو تمہارے لیڈر کو اقتدار کی کرسی سے گھسیٹ کر نکالا تھا، تم اپنے بھائی سے استعفی دلوا کر ان کا مجھ سے مقابلہ کراو۔
ان کا مزید کہنا تھا کہ علی امین گنڈاپور بہادر اور غیرت مند لوگ ہیں مگر یہ ان میں سے نہیں۔مولانا فضل الرحمان کے بھائی کے مطابق علی امین گنڈاپور کے انداز گفتگو اور تکلیف سے انہیں معلوم ہوچکا ہے کہ ان کے چل چلا کا زمانہ آچکا ہے۔اس کے بعد علی امین گنڈا پور نے پھر بیان داغتے ہوئے کہا کہ ضیا الرحمان سے زیادہ ووٹ تو میرے گھر کا جمعدار لے گا، مولانا کے بیٹے نے بھی چیلنج کیا تھا، آج وہ کہاں ہیں، پہلے کہا تھا اسمبلی میں ہم ہوں گے، آپ نہیں۔مولانا کے بھائی کو دیکھ کر عمر امین گنڈا پور بھی بھائی کی مدد کے لیے معاملے میں کود پڑے اور مخالفین کو آڑے ہاتھوں لیا۔
عمر امین گنڈا پور نے کہا کہ ضیا الرحمان کو اپنے سیاسی قد کاٹ کا اندازہ ہونا چاہیے، میرے بھائی کے مقابلے کا سوچنا بھی ان کے بس میں نہیں۔دیکھنا یہ ہے کہ فریقین میں یہ تکرار صرف بیانات تک محدود رہے گی یا پھر عملا ڈیرہ اسماعیل خان میں انتخابی میدان سجے گا۔