پنجاب اور خیبرپختونخوا میں الیکشن کیلئے فنڈ دینے کا بل مسترد

اسلا م آباد(سب نیوز)قومی اسمبلی کی قائمہ کمیٹی خزانہ نے پنجاب اور خیبرپختونخوا میں الیکشن کے لیے فنڈ دینے کا بل مسترد کردیا۔
قیصر شیخ کی زیر صدارت قومی اسمبلی کی قائمہ کمیٹی خزانہ کا اجلاس، قائمہ کمیٹی برائے خزانہ نے الیکشن کمیشن کو فنڈز فراہم کرنے کے لیے بھیجا گیا منی بل مسترد کر دیا۔
اجلاس میں وزارت خزانہ نے پنجاب میں انتخابات کے لیے فنڈز کی فراہمی سے معذرت کرلی۔
اجلاس میں وزیرِ مملکت خزانہ عائشہ غوث پاشا نے کہا کہ پاکستان آئی ایم ایف کے سخت پروگرام میں ہے، ہمیں فنڈز کی قلت اور بھاری خسارے کا سامنا ہے۔
عائشہ غوث پاشا نے کہا کہ ہمارے پاس مختص بجٹ کے علاوہ اضافی فنڈز دستیاب نہیں ہیں، اضافی فنڈز فراہم کیے تو یہ آئی ایم ایف پروگرام سے تجاوز ہوگا، آئی ایم ایف کے ساتھ طے شدہ خسارے تک محدود رہنا چاہتے ہیں۔
سید حسین طارق نے کہا کہ ہم حکومت کے ساتھ کھڑے ہیں،
چیئرمین قیصر احمد شیخ نے کہا کہ کمیٹی نے یہ فیصلہ متفقہ طور پر کیا ہے،کمیٹی یہ بل مسترد کرتی ہے، کمیٹی نے متفقہ طور پر قرارداد کے ذریعے انتخابات کیلئے فنڈز کی فراہمی کو مسترد کردیا۔