اقوام متحدہ اسلاموفوبیا سے نمٹنے کیلئے ایکشن پلان بنائے، بلاول بھٹو

واشنگٹن(سب نیوز )وزیر خارجہ بلاول بھٹو زرداری نے اقوام متحدہ پر اسلاموفوبیا سے نمٹنے کے لیے ایکشن پلان بنانے پر زور دیتے ہوئے کہا ہے کہ اسلاموفوبیا آج کے دور کا اہم مسئلہ ہے اور دنیا میں منظم طریقے سے اسلام کے خلاف نفرت پھیلائی جا رہی ہے۔
اسلامو فوبیا سے متعلق تقریب سے خطاب کے دوران انہوں نے کہا کہ اقوام متحدہ کے تحت اسلامو فوبیا کے خلاف عالمی دن پہلی دفعہ منایا جا رہا ہے، اسلاموفوبیا سے نمٹنے کے لیے سب کو ملکر کردار ادا کرنا ہو گا۔بلاول بھٹو زرداری نے کہا کہ اسلام امن اور رواداری کا دین ہے، مذہب اسلام امن اور برداشت کا درس دیتا ہے، دنیا میں فاشٹ پالیسیوں سے مسلمانوں کو نشانہ بنایا جارہا ہے، حجاب جیسے معاملات کو سیاست میں لانے کا مقصد اسلام کو نشانہ بنانا ہے۔
انہوں نے کہا کہ دہشتگردی کا کسی مذہب سے کوئی تعلق نہیں، دہشتگردی کو اسلام کے ساتھ جوڑا جاتا رہا ہے۔ وزیر خارجہ نے کہا کہ دنیا میں منظم انداز میں مسلمانوں کے خلاف نفرت پھیلائی گئی، فاشسٹ پالیسیوں سے مسلمانوں کو نشانہ بنایا جا رہا جب کہ حجاب پر پابندی اور توہین مذہب سنگین مسئلہ ہے، البتہ کرائسٹ چرچ جیسے واقعات سے معلوم ہوا اسلاموفوبیا دنیا میں پھیل رہا ہے۔
اس موقع پر گفتگو کرتے ہوئے اقوام متحدہ کے سیکرٹری جنرل انتونیو گوتریس نے کہا کہ اسلام امن اور بھائی چارے کا درس دیتا ہے، دنیا میں مسلمانوں کو امتیازی سلوک کا سامنا ہے، لہذا اقوام عالم کو انسانی حقوق کے تحفظ کے لئے متحد ہونا ہوگا۔