سویڈن نے امریکہ ایران دو ہفتہ جنگ بندی معاہدہ کا خیرمقدم کیا ہے، جو پاکستان سمیت دیگر ممالک کی اہم سفارتی کوششوں کے نتیجے میں طے پایا۔ اس پیش رفت سے آبنائے ہرمز میں بحری آمد و رفت کی بحالی کے امکانات بھی روشن ہوئے ہیں۔
سویڈش حکام کے مطابق اس مرحلے پر تمام فریقین کے لیے انتہائی ضبط و تحمل کا مظاہرہ کرنا نہایت ضروری ہے، تاکہ خطے میں سلامتی کو یقینی بنایا جا سکے، عالمی سپلائی چینز کا تحفظ ہو اور معصوم شہریوں کو مزید نقصان سے بچایا جا سکے۔
بیان میں مزید کہا گیا کہ اس پیش رفت کو ایک دیرپا اور پائیدار حل کی جانب بڑھانے کی ضرورت ہے، جو ایران کو جوہری ہتھیاروں کی تیاری سے روکے، خطے میں سلامتی کو درپیش خطرات کو کم کرے اور مغربی دنیا سمیت دیگر علاقوں میں عدم استحکام پیدا کرنے والی سرگرمیوں کا سدباب کرے۔
سویڈن نے اس بات پر بھی زور دیا کہ عالمی تجارت کے لیے بحری راستوں کی آزادی انتہائی اہم ہے۔ اسی تناظر میں سویڈن ان تقریباً 30 ممالک کے گروپ میں شامل ہے، جس کا آغاز برطانیہ نے کیا تھا، تاکہ آبنائے ہرمز کو دوبارہ کھولنے کے لیے ضروری اقدامات پر غور کیا جا سکے۔
سویڈن نے اس عزم کا اعادہ کیا کہ وہ ان کوششوں کی حمایت کے لیے تیار ہے، بالخصوص سیاسی حل کی جانب پیش رفت میں اپنا کردار ادا کرے گا۔
