بیجنگ : چینی وزیر خارجہ وانگ ای نے دعوت پر برطانیہ کی وزیر خارجہ یوویٹ کوپر سے ٹیلیفون پر بات کی اور مشرق وسطیٰ کی صورتحال پر تبادلۂ خیال کیا۔جمعہ کے روز کوپر نے کہا کہ بڑھتی ہوئی عالمی غیر یقینی صورتحال کے پیشِ نظر، برطانیہ چین کے ساتھ قریبی رابطہ برقرار رکھنا چاہتا ہے تاکہ جنگ کو جلد ختم کیا جا سکے، سفارتی مذاکرات کو دوبارہ شروع کیا جا سکے اور طویل مدتی حل تلاش کیا جا سکے۔
وانگ ای نے کہا کہ جنگ کے طول پکڑنے میں کسی کی جیت نہیں ہوتی، چین تمام فریقین پر زور دیتا ہے کہ وہ فوری طور پر عسکری کارروائیاں بند کریں، برابری کی بنیاد پر بات چیت کے ذریعے اختلافات حل کریں اور باہمی طور پر علاقائی امن و استحکام کو برقرار رکھیں۔
اقوام متحدہ کی سلامتی کونسل کے مستقل اراکین کی حیثیت سے، چین اور برطانیہ کو چاہیے کہ وہ اقوام متحدہ کے منشور کے مقاصد ،اصولوں اور بین الاقوامی تعلقات کے بنیادی قواعد کو برقرار رکھنے کے لیے مشترکہ طور پر کام کریں اور بین الاقوامی نظام کو مزید نقصان سے بچائیں۔ فریقین نے اس بات پر اتفاق کیا کہ دونوں ممالک کے رہنماؤں کے درمیان طے شدہ اتفاقِ رائے پر فعال عمل درآمد کیا جائے، تعلقات کو مضبوط بنایا جائے، اور چین اور برطانیہ کی طویل مدتی مستحکم جامع اسٹریٹجک شراکت داری کو مسلسل فروغ دیا جائے، تاکہ پیچیدہ اور غیر مستحکم عالمی حالات میں استحکام اور یقین دہانی فراہم کی جا سکے۔
