اسلام آباد (سب نیوز) مسافروں سے رشوت لے کر امیگریشن کلیئر کرنے کے سنگین الزامات پر فیڈرل انویسٹی گیشن(ایف آئی اے) کے ڈائریکٹر جنرل ڈاکٹر عثمان انور نے فوری نوٹس لیتے ہوئے اعلیٰ سطحی تحقیقات کا حکم دے دیا۔
ترجمان کے مطابق ایڈیشنل ڈائریکٹر جنرل امیگریشن اور ڈائریکٹر زون اسلام آباد نے خود تحقیقات کیں، جس کے دوران الزامات درست ثابت ہوئے۔ شواہد کی بنیاد پر ایف آئی اے کے دو اہلکاروں کے خلاف مقدمہ درج کر لیا گیا جبکہ چار مسافروں کو بھی مقدمے میں نامزد کیا گیا ہے۔
مقدمہ اینٹی کرپشن سیل ونگ کی جانب سے درج کیا گیا اور نامزد ایف آئی اے اہلکاروں کو گرفتار کر لیا گیا ہے۔ تحقیقات کے دوران ایک اہلکار نے انکشاف کیا کہ صرف ایک ہفتے کے عرصے میں بارہ مسافروں کو مبینہ طور پر رقم لے کر غیرقانونی طور پر امیگریشن کلیئر کیا گیا۔
ڈی جی ایف آئی اے ڈاکٹر عثمان انور نے واضح کیا کہ ادارے میں کرپشن اور غیرقانونی سرگرمیوں کو کسی صورت برداشت نہیں کیا جائے گا۔ انہوں نے کہا کہ محکمہ میں “کالی بھیڑوں” کی کوئی گنجائش نہیں اور بدعنوان عناصر کے خلاف بلاامتیاز کارروائی جاری رہے گی۔
