اسلام آباد(سب نیوز)چیئرمین سینیٹ کی مشیر محترمہ مصباح کھر نے جمہوریہ ترکیہ کے پاکستان میں سفیر ڈاکٹر عرفان نذیراوغلو سے ترک سفارتخانے اسلام آباد میں اہم ملاقات کی۔ملاقات کے دوران پاکستان اور ترکیہ کے درمیان دوطرفہ تعلقات خصوصا تجارت اور سرمایہ کاری کے فروغ کے امور کا تفصیل سے جائزہ لیا ۔ملاقات میں موجودہ علاقائی صورتحال اور باہمی دلچسپی کے دیگر امور پر بھی تفصیلی تبادلہ خیال کیا۔
محترمہ مصباح کھر نے دونوں ممالک کے درمیان تاریخی، دیرینہ اور برادرانہ تعلقات کو مزید مضبوط بنانے میں ترک سفیر کے فعال کردار کو سراہا۔ انہوں نے کہا کہ پاکستان اور ترکیہ کے تعلقات مشترکہ تاریخ، ثقافتی ہم آہنگی اور باہمی اعتماد پر مبنی ہیں، جو اقتصادی تعاون کے فروغ کے لیے مضبوط بنیاد فراہم کرتے ہیں۔انہوں نے دوطرفہ تجارت میں موجود وسیع مواقعوں کو اجاگر کرتے ہوئے تجارتی حجم میں اضافے، کاروباری برادریوں کے مابین روابط کے فروغ اور ترجیحی شعبوں میں مشترکہ منصوبوں کے قیام کے لیے عملی اقدامات کی ضرورت پر زور دیا۔ انہوں نے تجارت، سرمایہ کاری، انفارمیشن ٹیکنالوجی، انفراسٹرکچر، توانائی اور دفاعی پیداوار کے شعبوں میں تعاون بڑھانے کی اہمیت پر روشنی ڈالتے ہوئے کہا کہ مضبوط اقتصادی شراکت داری دونوں ممالک کے عوام کے لیے ٹھوس فوائد کا باعث بنے گی۔
محترمہ مصباح کھر نے مزید کہا کہ عوامی روابط اور پارلیمانی تبادلوں میں اضافہ دونوں ممالک کے درمیان اقتصادی اور اسٹریٹجک شراکت داری کو مزید مستحکم کرے گا۔ترک سفیر ڈاکٹر عرفان نذیراوغلو نے دوطرفہ تعاون کو مزید وسعت دینے اور اقتصادی روابط کو مضبوط بنانے کے عزم کا اعادہ کیا۔ انہوں نے اس امید کا اظہار کیا کہ پاکستان اور ترکیہ کے درمیان تجارت اور سرمایہ کاری کے تعلقات آئندہ برسوں میں مزید فروغ پائیں گے۔ انہوں نے چیئرمین سینیٹ سید یوسف رضا گیلانی کے لیے نیک تمناں کا اظہار کیا اور پاکستان میں آئی ایس سی کانفرنس کے کامیاب انعقاد پر محترمہ مصباح کھر کو مبارکباد پیش کی۔
