اسلام آباد(سب نیوز)چیئرمین کیپیٹل ڈویلپمنٹ اتھارٹی (سی ڈی اے)و چیف کمشنر اسلام آباد محمد علی رندھاوا کی زیر صدارت بدھ کے روز وفاقی دارالحکومت اسلام آباد میں رمضان المبارک میں امن و امان کی صورتحال اور سیکورٹی کے بہترین انتظامات کو یقینی بنانے سے متعلق سی ڈی اے ہیڈکوارٹرز میں اہم اجلاس منعقد ہوا۔ جس میں انسپکٹر جنرل (آئی جی)اسلام آباد پولیس سید علی ناصر رضوی، ممبر انجینئرنگ سید نفاست رضا، ڈپٹی کمشنر (ڈی سی) اسلام آباد عرفان نواز میمن سمیت سی ڈی اے و ضلعی انتظامیہ اور اسلام آباد پولیس کے سنئیر افسران نے شرکت کی۔
چیئرمین سی ڈی اے و چیف کمشنر اسلام آباد محمد علی رندھاوا نے کہا کہ وزیراعظم پاکستان شہباز شریف اور وفاقی وزیر داخلہ محسن نقوی کے وژن کے مطابق وفاقی دارالحکومت اسلام آباد کو محفوظ ترین شہر بنانے کیلئے تمام وسائل بروئے کار لائے جائیں۔ اجلاس میں آئی جی اسلام آباد سید علی ناصر رضوی نے رمضان المبارک میں شہر میں امن و امان کی صورتحال کو بہتر بنانے اور فول پروف انتظامات کیلئے کئے گئے اقدامات سے آگاہ کرتے ہوئے کہا کہ رمضان المبارک میں تمام مساجد اور امام بارگاہوں میں آنے والے نمازیوں کیلئے بہترین سیکورٹی اقدامات کے گئے ہیں۔ انہوں نے کہا کہ تمام مساجد اور امام بارگاہوں کی سیکورٹی اور نگرانی کیلئے جدید ٹیکنالوجی کو استعمال میں لایا جارہا ہے۔ اسی طرح رمضان بازاروں، مارکیٹس اور کمرشل مراکز میں بھی شہریوں کی جان و مال کے تحفظ کو یقینی بنانے کیلئے اقدامات کئے گئے ہیں۔آئی جی اسلام آباد نے کہا کہ رمضان المبارک میں اسلام آباد شہر بھر میں پولیس گشت میں بھی اضافہ کیا جارہا ہے۔ انہوں نے کہا کہ دارالحکومت اسلام آباد کے شہریوں کی جان و مال اور عزت کا تحفظ ہماری اولین ترجیح اور اسکو یقینی بنانے کیلئے اسلام آباد پولیس دن رات مصروف عمل ہے۔آئی جی اسلام آباد نے کہا کہ وفاقی دارالحکومت اسلام آباد کو محفوظ ترین شہر بنانے کیلئے سیف سٹی کو عصر حاضر کے تقاضوں اور جدید خطوط پر استوار کیا گیا ہے۔
انہوں نے کہا کہ دارالحکومت اسلام آباد میں سیف سٹی کیمروں اور جدید ٹیکنالوجی کے ذریعے شہر کی تمام مساجد، امام بارگاہوں، مرکزی شاہراہوں، مراکز اور سیکٹرز کی نگرانی کا میکنزم بنایا گیا ہے۔چیئرمین سی ڈی اے و چیف کمشنر اسلام آباد محمد علی رندھاوا نے کہا کہ رمضان المبارک میں تمام مساجد، امام بارگاہوں، مارکیٹس، کمرشل مراکز اور پارکس کے داخلی و خارجی راستوں کی خصوصی نگرانی کی جائے۔ انہوں نے کہا کہ تمام مساجد، امام بارگاہوں، مارکیٹس، کمرشل مراکز اور پارکس کے داخلی و خارجی راستوں پر جدید ٹیکنالوجی پر مبنی سی سی ٹی وی کیمروں کی تنصیب کو بھی یقینی بنایا جائے۔چیئرمین سی ڈی اے نے ہدایت کی کہ وفاقی دارالحکومت اسلام آباد میں سیکورٹی کو مزید فول پروف بنانے کیلئے تمام متعلقہ اداروں کے ساتھ مثر اور مربوط رابطوں کو بڑھایا جائے۔ انہوں نے کہا کہ تمام متعلقہ اداروں کی مشترکہ کاوشوں کی بدولت اسلام آباد میں مجموعی امن و امان اور سیکورٹی کی صورتحال کو مزید بہتر بنایا جاسکتا ہے۔چیئرمین سی ڈی اے نے کہا کہ دارالحکومت اسلام آباد کے شہریوں کو پرامن اور محفوظ ماحول فراہم کرنا ہماری اولین ترجیحات میں شامل ہے۔ انہوں نے مزید ہدایت کہ نہ صرف رمضان المبارک بلکہ عام دنوں میں بھی شہریوں کو بہترین سیکورٹی فراہم کرنے کیلئے تمام وسائل بروئے کار لائے جائیں۔
