ملتان: جہانگیر خان ترین نے کہا ہے کہ تعلیم کسی بھی معاشرے کی ترقی اور خوشحالی کی بنیاد ہے۔ باصلاحیت طلباء و طالبات کو معیاری تعلیمی سہولیات فراہم کرنا وقت کی اہم ضرورت ہے، تاکہ وہ جدید دور کے تقاضوں سے ہم آہنگ ہو کر ملک و قوم کی خدمت کر سکیں۔
یہ بات انہوں نے گورنمنٹ گرلز ہائر سیکنڈری سکول تلمبہ میں جدید ٹیکنالوجی بلاک کے افتتاح کے موقع پر منعقدہ تقریب سے خطاب کرتے ہوئے کہی۔ ٹیکنالوجی بلاک میں جدید سائنس و کمپیوٹر لیب قائم کی گئی ہے۔ جہانگیر خان ترین نے میاں چنوں میں گرلز ڈگری کالج بنانے کا اعلان کیا اور کہا کہ کالج کے لئے 5 ایکڑ زمین وقف کردی ہے۔ جہانگیر ترین نے یہ بھی اعلان کیا کہ تحصیل میاں چنوں کے 50 سرکاری سکولوں میں سائنس و کمپیوٹر لیبز کی اپ گریڈیشن کی جائے گی اس منصوبے پر 7 کروڑ روپے لاگت آئے گی۔
واضح رہے کہ اس سے قبل بھی ترین ایجوکیشن فاؤنڈیشن کی جانب سے ضلع خانیوال میں مختلف تعلیمی اداروں میں سائنس اور کمپیوٹر لیبارٹریز قائم کی جا چکی ہیں جن پر 11 کروڑ روپے لاگت ائی ہے ان سکولوں میں خانیوال پبلک اسکول، گورنمنٹ ماڈل بوائز ہائر سیکنڈری اسکول، گورنمنٹ گرلز ہائیر سیکنڈری اسکول کچا کھوہ، گورنمنٹ گرلز ماڈل ہائی اسکول میاں چنوں اور گورنمنٹ بوائز ہائی اسکول چک 27/10 آر شامل ہیں۔ افتتاحی تقریب کے موقع پر موقع پر ایڈیشنل ڈپٹی کمشنر ریونیو خانیوال غلام مصطفیٰ سہیڑ، اے سی میاں چنوں ساجدہ رزاق، چیف ایگزیکٹو آفیسر ایجوکیشن فیاق سندھو، چیف ایگزیکٹو آفیسر ترین ایجوکیشن فائونڈیشن اکبر خان, پرنسپل ادادہ ارشاد بی بی و دیگر نے بھی خطاب کیا۔
