راولپنڈی (نمائندہ خصوصی) راولپنڈی پولیس نے خود احتسابی کی روایت کو برقرار رکھتے ہوئے منشیات فروشوں سے مبینہ روابط ثابت ہونے پر اے ایس آئی محمد اختر کو ملازمت سے برخاست کر دیا ہے۔ پولیس ذرائع کے مطابق مذکورہ اہلکار کے خلاف کچھ عرصے سے شکایات موصول ہو رہی تھیں، جن کی بنیاد پر تحقیقات کا آغاز کیا گیا۔
تفصیلات کے مطابق اے ایس آئی محمد اختر نے اپنی ملازمت کا ایک بڑا حصہ چکوال میں گزارا، جہاں ان کے طرزِ عمل کے حوالے سے بھی مختلف شکایات سامنے آتی رہی تھیں۔ تقریباً دو سال قبل ان کا تبادلہ راولپنڈی کر دیا گیا، تاہم ذرائع کے مطابق وہاں بھی ان کی سابقہ روش برقرار رہی، جس پر محکمانہ کارروائی عمل میں لائی گئی۔
پولیس حکام کا کہنا ہے کہ محکمہ میں احتساب کے عمل کو یقینی بنانے کے لیے کسی قسم کی کوتاہی برداشت نہیں کی جائے گی اور ایسے عناصر کے خلاف سخت کارروائی جاری رہے گی جو محکمہ کی ساکھ کو نقصان پہنچانے کا باعث بنیں۔
دریں اثنا عوامی حلقوں نے اس اقدام کو سراہتے ہوئے مطالبہ کیا ہے کہ مذکورہ اہلکار کے اثاثہ جات کی بھی چھان بین کی جائے اور اسی نوعیت کے دیگر معاملات میں ملوث اہلکاروں کے خلاف بھی کارروائی عمل میں لائی جائے۔ شہریوں نے امید ظاہر کی کہ پنجاب پولیس جرائم پیشہ عناصر سے روابط رکھنے والے اہلکاروں کے خلاف اسی طرح بلاامتیاز کارروائی جاری رکھے گی تاکہ عوام کا اعتماد مزید مستحکم ہو۔
