نیویارک (سب نیوز): اقوامِ متحدہ کے ہیڈ کوارٹر میں ’یومِ یکجہتی کشمیر‘ کے حوالے سے ایک اہم تقریب منعقد ہوئی جس میں عالمی سفیروں اور پاکستانی امریکن کمیونٹی کے قائدین نے شرکت کی۔ اس موقع پر پاکستانی امریکن کمیونٹی آف لانگ آئی لینڈ (PACOLI) کے ایک اعلیٰ سطحی وفد نے امریکہ میں مقیم پاکستانیوں کی نمائندگی کرتے ہوئے کشمیریوں سے اظہارِ یکجہتی کیا۔
پاکستانی کمیونٹی کی نمائندگی کرتے ہوئے پاکولی کی کابینہ کے اہم اراکین نے تقریب میں شرکت کی، جن میںعتیق قادری (صدر، پاکولی)،
جمال ظفر (نائب صدر، پاکولی)،* مس علیشہ باری (ڈائریکٹر، پاکولی) ،چوہدری فیصل محمود (ڈائریکٹر، پاکولی) شامل تھے۔
وفد کے اراکین نے عالمی مندوبین سے گفتگو کرتے ہوئے واضح کیا کہ سمندر پار پاکستانی اپنے کشمیری بھائیوں کی سیاسی، سفارتی اور اخلاقی حمایت جاری رکھیں گے۔
عالمی مندوبین کے خطابات:
تقریب سے اقوامِ متحدہ میں پاکستان کے مستقل مندوب سفیر عاصم افتخار احمد، ترکیہ کے مستقل مندوب سفیر احمد یلدز، اور آذربائیجان کے مستقل مندوب سفیر توفیق ایف موسایف نے خطاب کیا۔ مقررین نے مسئلہ کشمیر کو عالمی امن کے لیے ناگزیر قرار دیتے ہوئے انسانی حقوق کی پامالیوں کو روکنے پر زور دیا۔ فلسطینی صحافی عبدالحمید صیام اور ڈاکٹر غلام نبی فائی نے بھی کشمیری عوام کی جدوجہدِ آزادی کو خراجِ تحسین پیش کیا۔
قونصل جنرل کا اظہارِ تشکر:
نیویارک میں پاکستان کے قونصل جنرل جناب عامر احمد اتوزئی نے تقریب کے اختتام پر تمام شرکاء، بالخصوص پاکولی (PACOLI) کی قیادت کا شکریہ ادا کیا جنہوں نے کمیونٹی کو متحرک کرنے اور کشمیر کا مقدمہ عالمی سطح پر پیش کرنے میں اہم کردار ادا کیا۔
اقوامِ متحدہ میں یومِ یکجہتی کشمیر کی پروقار تقریب: ’پاکولی‘ کے وفد کی بھرپور شرکت اور پاکستانی کمیونٹی کی نمائندگی
روزانہ مستند اور خصوصی خبریں حاصل کرنے کے لیے ڈیلی سب نیوز "آفیشل واٹس ایپ چینل" کو فالو کریں۔
