اسلام آباد (سب نیوز)چیف جسٹس پاکستان یحییٰ آفریدی کی زیر صدارت سپریم جوڈیشل کونسل کا اہم اجلاس ہوا،سپریم کورٹ بلڈنگ میں ہونے والے اجلاس میں اعلی عدلیہ کے سینئر ججز کی شرکت،اجلاس میں چیف جسٹس وفاقی آئینی عدالت امین الدین خان ،سپریم کورٹ کے ججز جسٹس منیب اختر ،جسٹس جمال مندوخیل ، وفاقی آئینی عدالت کے جج جسٹس سید حسن اظہر رضوی،چیف جسٹس لاہور ہائیکورٹ جسٹس عالیہ نیلم ،چیف جسٹس اسلام آباد ہائیکورٹ جسٹس سرفراز ڈوگر شریک ہوئے ۔
اعلامیہ کے مطابق 8شکایات کے معاملے پر سپریم جوڈیشل کونسل کی تشکیل نو کر دی گئی،چیف جسٹس اسلام آباد ہائیکورٹ کی جگہ چیف جسٹس پشاور ہائیکورٹ جسٹس عتیق شاہ کو شامل کر لیا گیا،سپریم جوڈیشل کونسل نے آئین کے آرٹیکل 209 کے تحت دائر 59 شکایات کا تفصیلی جائزہ لیا، 59میں سے 50شکایات کو نمٹا کر فائل کرنے کا حکم دیدیا گیا، 6شکایات کو مزید غور کے لیے موخر کر دیا گیا،3شکایات پر قانون کے مطابق مزید کارروائی کرنے کی ہدایت جاری، سپریم جوڈیشل کونسل نے ڈرافٹ رولز کی حتمی منظوری موخر کرنے کا متفقہ فیصلہ کیا، ڈرافٹ رولز پر حتمی فیصلہ اگلے اجلاس تک ملتوی کر دیا گیا۔
