مظفرآباد :سینئر حریت رہنما سید منظور شاہ نے کہا ہے کہ افضل گرو شہید کشمیری قوم کے سچے ہیرو اور جدوجہدِ آزادی کی ایک درخشاں علامت ہیں۔
افضل گرو کے 13ویں یومِ شہادت کے موقع پر اپنے خصوصی پیغام میں انہوں نے کہا کہ بھارت نے ایک من گھڑت مقدمے اور جانبدارانہ عدالتی کارروائی کے ذریعے ایک بے گناہ کشمیری نوجوان کو پھانسی دے کر اپنی نام نہاد جمہوریت، عدل و انصاف اور انسانی حقوق کے دعوؤں کو خود ہی بے نقاب کر دیا۔سید منظور شاہ نے کہا کہ افضل گرو کی شہادت کشمیری عوام کے حوصلے پست کرنے میں ناکام رہی ہے بلکہ اس قربانی نے کشمیری قوم کے جذبۂ حریت کو مزید مضبوط اور توانا کیا ہے۔
انہوں نے واضح کیا کہ کشمیری قوم اپنے عظیم شہداء کی قربانیوں کو کبھی فراموش نہیں کرے گی اور حقِ خودارادیت کی جدوجہد ہر قیمت پر اپنے منطقی انجام تک جاری رہے گی۔انہوں نے عالمی برادری سے مطالبہ کیا کہ وہ مقبوضہ جموں و کشمیر میں جاری بھارتی مظالم، ماورائے عدالت قتل، جبری گمشدگیوں اور انسانی حقوق کی سنگین خلاف ورزیوں کا سنجیدگی سے نوٹس لے اور کشمیری عوام کو ان کا تسلیم شدہ اور جائز حق دلوانے کے لیے اپنا مؤثر اور عملی کردار ادا کرے۔
