اسلام آباد: برین ڈیزائنر کے زیرِ اہتمام چوتھا ایڈیشن “ایکسپلور اینڈ انویسٹ اِن پاکستان انٹرنیشنل ایوارڈز 2026” کامیابی کے ساتھ اسلام اباد کے مقامی ہوٹل میں منعقد ہوا، جس کی قیادت ینگ لیڈر و سی ای او برین ڈیزائنر، جناب محمد رؤف راجہ نے کی۔ اس تقریب کا مقصد پاکستان میں سرمایہ کاری کے مواقع کو فروغ دینا، معاشی سفارتکاری، کاروباری سرگرمیوں اور بین الاقوامی تعاون کو مضبوط بنانا تھا۔
اس باوقار تقریب کے مہمانِ خصوصی، سیدال خان نصر، قائم مقام چیئرمین سینیٹ آف پاکستان تھے۔ تقریب میں ممتاز شخصیات نے شرکت کی جن میں جناب طارق محمود جدون، نائب صدر ایف پی سی سی آئی؛ سید قمر رضا شاہ، چیئرمین اوورسیز پاکستانی فاؤنڈیشن؛ کرنل جاوید اقبال، ڈائریکٹر ایف ڈبلیو او؛ عمر خطاب، ڈائریکٹر گرین ٹورازم پاکستان؛ بیرسٹر عابد حسین؛ کرن افضل، ورلڈ بینک گروپ؛ انڈونیشیا اور ملائیشیا کے ڈپٹی سفیر، صنعتکار، راولپنڈی چیمبر آف اسمال ٹریڈرز اینڈ اسمال انڈسٹریز کے نمائندگان، معروف کاروباری شخصیات، نوجوان کاروباری افراد اور بڑی تعداد میں اوورسیز پاکستانیوں نے شرکت کی۔ ملک بھر سے کاروباری برادری کی بھرپور شرکت نے اس تقریب کو انتہائی کامیاب اور مؤثر بنا دیا۔
تقریب سے خطاب کرتے ہوئے سیدال خان نصر، قائم مقام چیئرمین سینیٹ آف پاکستان نے کہا:
“پاکستان میں ملکی و غیر ملکی سرمایہ کاری کے بے شمار مواقع موجود ہیں۔ ایکسپلور اینڈ انویسٹ اِن پاکستان جیسے پلیٹ فارمز پاکستان کا مثبت تشخص اجاگر کرنے اور سرمایہ کاروں کو مختلف شعبوں میں مواقع تلاش کرنے کی ترغیب دیتے ہیں۔ میں برین ڈیزائنر اور محمد رؤف راجہ کو اس شاندار اور بامقصد تقریب کے انعقاد پر مبارکباد پیش کرتا ہوں۔”
محمد رؤف راجہ، سی ای او برین ڈیزائنر نے اپنے کلیدی خطاب میں کہا:
“ہمارا مشن پاکستان کو عالمی کاروباری برادری سے جوڑنا، نوجوانوں میں کاروباری سوچ کو فروغ دینا اور پائیدار معاشی ترقی کو ممکن بنانا ہے۔ ایکسپلور اینڈ انویسٹ اِن پاکستان کے ذریعے ہم نوجوانوں، ایس ایم ایز اور اوورسیز پاکستانیوں کو قومی ترقی میں فعال کردار ادا کرنے کے مواقع فراہم کر رہے ہیں۔”
جناب طارق محمود جدون، نائب صدر ایف پی سی سی آئی نے کہا:
“ایف پی سی سی آئی ان تمام اقدامات کی بھرپور حمایت کرتا ہے جو تجارت، سرمایہ کاری اور کاروباری سرگرمیوں کے فروغ کا باعث بنیں۔ یہ پلیٹ فارم بزنس کمیونٹی کو بہترین نیٹ ورکنگ کے مواقع فراہم کرتا ہے اور پاکستان کے کاروباری ماحول کو مضبوط بنانے میں اہم کردار ادا کرتا ہے۔”
بیرسٹر عابد حسین نے کہا:
“نوجوان کاروباری افراد کی حوصلہ افزائی اور ان کی صلاحیتوں کو اجاگر کرنا ایک مضبوط اور مستحکم معیشت کی بنیاد ہے۔ اس طرح کے پلیٹ فارمز نوجوان قیادت اور جدت کو فروغ دیتے ہیں۔”
تقریب کے دوران ایوارڈز کی تقسیم، پینل مباحثے، بزنس نیٹ ورکنگ سیشنز اور قومی و بین الاقوامی سطح پر نمایاں خدمات انجام دینے والی شخصیات اور اداروں کی حوصلہ افزائی و اعزاز بھی کیا گیا۔
ملک و بیرونِ ملک سے تعلق رکھنے والے کاروباری رہنماؤں، سرمایہ کاروں، نوجوان کاروباری افراد، اسٹارٹ اپس اور اوورسیز پاکستانیوں کی بڑی تعداد نے شرکت کی، جس سے یہ تقریب 2026 کے کامیاب ترین کاروباری ایونٹس میں شامل ہو گئی۔
تقریب کا اختتام پبلک پرائیویٹ پارٹنرشپ، بین الاقوامی تعاون، نوجوانوں کے فروغ اور پاکستان کی پائیدار معاشی ترقی کے عزم کے ساتھ ہوا۔
