اسلام آباد/نیویارک: سابق وفاقی وزیر برائے اقلیتی امور اکرم مسیح گل نے کہا ہے کہ دفاعی اداروں میں بھی اقلیتوں کےلئے پانچ فیصد نوکریوں کا کوٹہ مختص کیا جائے تاکہ وہ بھی معاشی طور پر ترقی کرسکیں ۔ ان خیالات کا اظہار انہوں نے نیویارک میں اپنی رہائش گاہ پر سابق وفاقی وزیر وسینیٹر کامران مائیکل کے اعزاز میں دیے گئے عشائیے کے موقع پر کیا۔
اکرم گل نے کہا کہ قومی وصوبائی ترقیاتی فنڈز کا پانچ فیصد غیر مسلم علاقوں میں خرچ کیا جائے تا کہ وہ بھی زندگی کی بنیادی سہولتوں سے استفادہ ہوسکیں۔ اس موقع پر سابق وفاقی وزیر برائے پورٹ اینڈ شپنگ سینیٹر کامران مائیکل نے کہا کہ حکومت بین المذاہب ہم آہنگی کے فروغ کےلئے نمایاں کام کر رہی ہے ۔انہوں نے امریکا میں مقیم پاکستانیوں سے بھی مطالبہ کیا کہ وہ پاکستان کے مثبت کردار کو عالمی سطح پر اجاگر کریں ۔ اس موقع پر پاسٹر طارق رحمت، پاسٹر روبن یامین اور ولیم مائیکل نے پاکستان کی تعمیر وترقی اور خوشحالی کےلئے دعا کی۔
