اسلام آباد(آئی پی ایس )اسلام آباد ہائیکورٹ نے خصوصی عدالتوں، ٹربیونلز اور لا افسران کے جوڈیشل الاونسز کی ادائیگی روکنے کے احکامات معطل کرتے ہوئے وفاق اور وزارت خزانہ، کنٹرولر جنرل اکاونٹس اور اکانٹنٹ جنرل پاکستان کو نوٹس جاری کرتے ہوئے دو ہفتوں میں جواب طلب کرلیا۔اسلام آباد ہائیکورٹ کے جسٹس ارباب محمد طاہر نے ملازمین کی درخواست پر سماعت کا حکم نامہ جاری کر دیا۔
عدالت نے الاونسز روکنے کے اکاونٹنٹ جنرل آفس اور وزارت خزانہ کے احکامات معطل کر دیے، عدالت نے قرار دیا کہ 5 اور 15 ستمبر 2025 کے آرڈرز کے خطوط معطل کیے جاتے ہیں۔اسلام آباد ہائیکورٹ نے وفاق اور وزارت خزانہ، کنٹرولر جنرل اکاونٹس اور اکاونٹنٹ جنرل پاکستان کو نوٹس جاری کرتے ہوئے فریقین سے دو ہفتوں میں پیراوائز کمنٹس جمع کرانے کی ہدایت کر دی۔عدالت نے تحریری حکم نامہ جاری کر دیا جس میں کہا گیا ہے کہ درخواست گزار وکیل کے مطابق وزارت خزانہ اور اکاونٹنٹ جنرل آفس نے ملازمین کے الاونسز روک دیے ہیں۔وکیل کے مطابق لاہور ہائیکورٹ کے ملتان اور بہاولپور بینچز نے احکامات پہلے ہی معطل کر رکھے ہیں ،بعدِ ازاں کیس کی آئندہ سماعت 9 فروری کو ہوگی۔
