اسلام آباد(سب نیوز)اسپیکر قومی اسمبلی سردار ایاز صادق سے آسٹریلیا کے ہائی کمشنر نے پارلیمنٹ ہاوس میں ملاقات کی۔ ملاقات میں پاکستان اور آسٹریلیا کے مابین دوطرفہ تعلقات، باہمی تعاون سمیت اہم علاقائی اور عالمی امور پر تفصیلی تبادلہ خیال کیا گیا۔ملاقات میں دونوں فریقین نے پاکستان اور آسٹریلیا کے درمیان دوستانہ اور دیرینہ تعلقات کو مزید مستحکم بنانے اور مختلف شعبہ جات میں تعاون بڑھانے پر اتفاق کیا۔
اسپیکر سردار ایاز صادق نے دونوں ممالک کے مابین خوشگوار تعلقات کو مزید وسعت دینے کے عزم کا اعادہ کرتے ہوئے کہا کہ پارلیمانی سفارتکاری دوطرفہ تعلقات کے فروغ میں اہم کردار ادا کر سکتی ہے۔اسپیکر سردار ایاز صادق نے پاکستان میں سرمایہ کاری کے مواقع پر روشنی ڈالتے ہوئے کہا کہ ملک میں اقتصادی شعبوں، بالخصوص لائیو اسٹاک اور مائننگ کے شعبے میں سرمایہ کاری کے وافر مواقع موجود ہیں۔ انہوں نے کہا کہ پاکستان معدنی وسائل سے مالا مال ہے اور دنیا بھر کے سرمایہ کار پاکستان کے معدنی وسائل میں گہری دلچسپی لے رہے ہیں۔
انہوں نے مزید کہا کہ قومی اسمبلی میں قائم پاک۔آسٹریلیا پارلیمانی فرینڈ شپ گروپ دونوں ممالک کی پارلیمانوں کے درمیان روابط کو فروغ دینے میں فعال کردار ادا کر رہا ہے۔آسٹریلیا کے ہائی کمشنر ٹموتھی کین نے پاکستانی قوم کو ثابت قدم اور مہمان نواز قرار دیتے ہوئے کہا کہ پاکستانی تارکین وطن کی بڑی تعداد آسٹریلیا کی تعمیر و ترقی میں اہم کردار ادا کر رہی ہے۔ انہوں نے کہا کہ آسٹریلوی سرمایہ کار پاکستان کے مائننگ کے شعبے میں سرمایہ کاری کے خواہاں ہیں اور آسٹریلیا پاکستان کے ساتھ اپنے دیرینہ اور خوشگوار تعلقات کو بڑی اہمیت دیتا ہے۔مزید برآں، آسٹریلوی ہائی کمشنر نے پاکستان کے جمہوری نظام اور پارلیمانی اداروں کے مثر کردار کو سراہتے ہوئے اسپیکر قومی اسمبلی سردار ایاز صادق کی قیادت میں قومی اسمبلی کے فعال کردار کی تعریف کی۔
