اسلام آباد(سب نیوز) نائب وزیراعظم محمد اسحاق ڈار سے پاکستان میں تعینات ایران کے سفیر رضا امیری مقدم نے ملاقات کی۔ ترجمان دفتر خارجہ کے مطابق ملاقات کے دوران سفیر نے پاکستان اور ایران کے درمیان دوطرفہ ادارہ جاتی فریم ورک کے تحت مختلف شعبوں میں تعاون اور ہونے والی پیش رفت سے نائب وزیراعظم کو آگاہ کیا۔
نائب وزیراعظم محمد اسحاق ڈار نے اس موقع پر اہم ترجیحی شعبوں میں ایران کے ساتھ تعلقات اور باہمی تعاون کو مزید مستحکم اور گہرا کرنے کے لیے پاکستان کے عزم کا اعادہ کیا۔ایران کے سفیر رضا امیری مقدم نے ایرانی وزیرِ خارجہ عباس عراقچی کی جانب سے نائب وزیراعظم کو سالِ نو کی مبارکباد پہنچائی اور ایک خط پیش کیا، جس پر نائب وزیراعظم نے خیرمقدم کرتے ہوئے نیک تمناوں کا اظہار کیا۔
