ڈھاکہ: (آئی پی ایس) بنگلہ دیش کرکٹ بورڈ کے ڈائریکٹر آصف اکبر نے دو ٹوک الفاظ میں کہا ہے کہ ان کی ٹیم ٹی ٹوئنٹی ورلڈکپ کھیلنے کسی صورت بھارت نہیں جائے گی۔
ڈائریکٹر بنگلہ دیش کرکٹ بورڈ آصف اکبر نے بھارت کےحوالے سے سخت مؤقف اپناتے ہوئے کہا کہ آئی سی سی کا سری لنکا یا بنگلہ دیش کو مقام کے طور پر سلیکٹ کرنا الگ معاملہ ہے، ہم نےفیصلہ کیا ہےکہ ورلڈکپ کے لیے بھارت نہیں جائیں گےکیونکہ وہاں ہم محفوظ نہیں ہیں۔
بنگلہ دیش کرکٹ بورڈ اس حوالے سے پہلے ہی آئی سی سی کو بذریعہ ای میل اپنے تحفظات سے آگاہ کر چکا ہے، جبکہ اپنے میچز سری لنکا منتقل کرنے کی باضابطہ درخواست بھی دے دی گئی ہے۔
ذرائع آئی سی سی کے مطابق بنگلا دیش کی درخواست پر ایک یا دو روز میں ممکنہ طور پر فیصلہ کیے جانے کا امکان ہے۔
آئی سی سی ٹی ٹوئنٹی ورلڈ کپ کا آغاز 7 فروری سے بھارت اور سری لنکا میں ہوگا، شیڈول کے مطابق بنگلہ دیش کے چار گروپ میچز بھارت میں رکھے گئے ہیں۔
خیال رہے کہ آئی پی ایل کی ٹیم کلکتہ نائٹ رائڈرز نے بنگلادیش کے فاسٹ بولر مستفیض الرحمان کو بھارتی ہندو انتہا پسندوں کی دھمکیوں کے بعد لیگ سے باہر کر دیا تھا جس کے بعد دونوں کرکٹ بورڈز کے درمیان تعلقات کشیدہ ہو گئے اور بنگلہ دیش کرکٹ بورڈ نے ہنگامی اجلاس بلاتے ہوئے اپنی ٹیم بھارت نہ بھیجنے کا اعلان کیا۔
