اسلام آباد (آئی پی ایس) کیپیٹل ڈیولپمنٹ اتھارٹی اسلام آباد نے جنگلی شہتوت کے درخت کاٹ کر مقامی درختوں کی شجر کاری کے لیے ٹینڈر جاری کر دیا۔
سی ڈی اے کی طرف سے جاری کیے گئے ٹینڈر میں کہا گیا ہے کہ سپریم کورٹ کے احکامات پر عمل درامد کرتے ہوئے اسلام آباد میں پولن الرجی کا باعث بننے والے جنگلی شہتوت کے درختوں کو کاٹ کر ان کی جگہ ماحول دوست مقامی درخت لگانے کا فیصلہ کیا گیا ہے۔
کیپٹل ڈیولپمنٹ اتھارٹی کے ذرائع کے مطابق جس ٹھیکیدار کو جنگلی شہتوت کے درخت کاٹنے کا ٹھیکا دیا گیا تھا، اس نے 3 سے 4 ایکڑ پر جنگلی شہتوت کے ساتھ وہاں لگے تمام درخت کاٹ دیے۔
ذرائع کا بتانا ہے کہ وفاقی دارالحکومت میں تقریباً چار ایکڑ کا ٹکڑا ہر درخت سے خالی کر دیا گیا، ٹھیکیدار نے یہ کٹائی بغیر مارکنگ اور شناخت کے کی ہے۔
