اسلام آباد(سب نیوز)چیئرمین کیپیٹل ڈویلپمنٹ اتھارٹی (سی ڈی اے)و چیف کمشنر اسلام آباد محمد علی رندھاوا کی زیر صدارت مختلف ڈویلپمنٹ پراجیکٹس کے حوالے سے جمعہ کے روز سی ڈی اے ہیڈکوارٹرز میں اہم اجلاس منعقد ہوا۔ اجلاس میں سی ڈی اے بورڈ کے ممبر ایڈمن طلعت محمود، ممبر فنانس طاہر نعیم، ممبر انجینئرنگ سید نفاست رضا، ممبر پلاننگ و ڈیزائن ڈاکٹر خالد حفیظ، ممبر انوائرمنٹ اسفندیار بلوچ سمیت دیگر متعلقہ افسران نے شرکت کی۔
اجلاس میں وفاقی دارالحکومت اسلام آباد میں ایک جدید کنونشن سینٹر اور ایکسپو سینٹر کے قیام کے حوالے سے جائزہ لیا گیا۔چیئرمین سی ڈی اے محمد علی رندھاوا نے کہا کہ بین الاقوامی کانفرنسوں سمیت آئندہ ایس سی او اجلاس کے انعقاد سے قبل وفاقی دارالحکومت اسلام آباد میں اس منصوبے کی تکمیل کو یقینی بنایا جائے۔اجلاس کو بریفنگ دیتے ہوئے بتایا گیا کہ کنونشن اور ایکسپو سینٹر کی تعمیر کیلئے مناسب جگہ کے انتخاب کے حوالے سے تجاویز زیر غور ہیں۔چیئرمین سی ڈی اے محمد علی رندھاوا نے کہا کہ کنونشن اور ایکسپو سینٹر کیلئے ایسی جگہ کا انتخاب کیا جائے جہاں پبلک کیلئے آنے میں آسانی اور بہتر پارکنگ کی بہترین سہولیات میسر آئیں۔ انہوں نے کہا کہ کنونشن سینٹر اور ایکسپو سینٹر کی تعمیر میں بین الاقوامی معیارات کو ملحوظ خاطر رکھا جائے۔ چیئرمین سی ڈی اے نے کہا کہ یہ منصوبہ شہر کو ایک جدید اور عالمی معیار کا دارالحکومت بنانے کی طرف ایک اہم قدم ہے۔ اجلاس میں وفاقی دارالحکومت اسلام آباد میں میزبانی کی صنعت کو فروغ دینے کیلئے اسلام آباد میں لگثرری ہوٹل کی تعمیر کے حوالے سے جائزہ لیا گیا۔
چیئرمین سی ڈی اے نے ہدایت کہ اس منصوبے کے ٹینڈرنگ کے عمل کو مزید تیز کیا جائے تاکہ اس پر باقاعدہ آغاز اگلے سال ممکن ہوسکے۔ انہوں نے کہا کہ منصوبوں کے تمام عمل میں اوپن اور شفاف مقابلہ جاتی طریقہ کار کو ہر صورت یقینی بنایا جائے۔چیئرمین سی ڈی اے نے کہا کہ اس سلسلے میں اسلام آباد شہر کی خوبصورتی اور ترقی کے ساتھ ساتھ بین الاقوامی تقریبات کی میزبانی کی صلاحیت بڑھائی جارہی ہے۔ انہوں نے ہدایت کی کہ ان میگا ترقیاتی منصوبوں کی تکمیل میں کوالٹی کے اعلی معیار میں کوئی سمجھوتہ نہ کیا جائے۔ چیئرمین سی ڈی اے نے کہا کہ ان میگا منصوبوں کی تکمیل سے وفاقی دارالحکومت اسلام آباد بین الاقوامی اور قومی تقریبات، سیاحت اور سفارتی سرگرمیوں کا مرکز بن جائیگا۔ انہوں نے مزید کہا کہ وفاقی دارالحکومت اسلام آباد کو دنیا کا بہترین اور مثالی دارالحکومت بنانے کیلئے تمام وسائل بروئے کار لائے جارے ہیں۔
