پی ٹی آئی اسلام آباد کی کاغذات نامزدگی جمع کروانے کی تاریخ میں توسیع کے حوالے سے چیف الیکشن کمشنر کو درخواست

اسلام آباد(آئی پی ایس )پاکستان تحریک انصاف اسلام آباد نے چیف الیکشن کمشنر کو وفاقی دارالحکومت میں بلدیاتی انتخابات کے لیے کاغذات نامزدگی کی تاریخ میں تین روزہ توسیع کی باضابطہ درخواست کردی ہے۔
پی ٹی آئی کے سیکریٹری بلدیات کمیٹی انجم شہزاد تنولی کی جانب سے چیف الیکشن کمشنر سکندر سلطان راجا کو درخواست دی گئی ہے اور بلدیاتی انتخابات کے لیے کاغذات نامزدگی جمع کرانے کی آخری تاریخ 27 دسمبر مقرر کرنے کی استدعا کی ہے۔درخواست میں کہا گیا ہے کہ 26 دسمبر کو مقامی تعطیل کے باعث انتخابی عمل متاثر ہونے کا خدشہ ہے لہذا الیکشن کمیشن سے شفافیت اور منصفانہ عمل کے لیے ڈیڈ لائن بڑھانے کی اپیل ہے۔
پی ٹی آئی کی جانب سے درخواست میں کہا گیا ہے کہ اسلام آباد میں بلدیاتی انتخابات کے پہلے مرحلے میں 125 یونین کونسلز شامل ہیں، ہر یونین کونسل میں 9کونسلرز کے کاغذات نامزدگی جمع ہوں گے لیکن سرکاری تعطیل سے امیدواروں اور متعلقہ دفاتر کو انتظامی مشکلات کا سامنا ہوگا۔درخواست میں موقف اپنایا گیا ہے کہ آخری دن غیر ضروری رش اور مسائل پیدا ہونے کا خدشہ، تین دن کی توسیع سے انتخابی عمل میں شفافیت اور موثر شرکت ممکن ہوگی۔پی ٹی آئی کی جانب سے درخواست کی کاپی چیف الیکشن کمشنر اسلام آباد کو بھی ارسال کردی گئی ہے۔