پی ٹی اے نے تمام سمز کا صارف کے اپنے نام پر رجسٹرڈ ہونا لازمی قرار دیدیا

اسلام آباد (سب نیوز)پاکستان ٹیلی کمیونیکیشن اتھارٹی (پی ٹی اے)نے تمام سمز کا صارف کے اپنے نام پر رجسٹرڈ ہونا لازمی قرار دیدیا۔پی ٹی اے نے ٹیلی کام صارفین کیلئے سم کے ذمہ دارانہ استعمال سے متعلق ہدایت نامہ جاری کردیا۔
جاری کردہ اعلامیے میں پی ٹی اے کا کہنا ہے کہ کسی اور کے نام رجسٹرڈ سم کا استعمال قانون کی خلاف ورزی ہے،سم کے غلط استعمال کی مکمل ذمہ داری رجسٹرڈ صارف پر ہوگی۔پی ٹی اے کے مطابق صارفین اپنی سمز اور ٹیلی کمیونیکیشن کنکشنزکا ذمہ دارانہ استعمال یقینی بنائیں، سم کے کسی بھی غلط استعمال کی مکمل ذمہ داری متعلقہ رجسٹرڈ صارف پرعائد ہوتی ہے،صارفین اپنی سم یا ڈیوائس سے تمام کالز،میسجز، ڈیٹا استعمال کے انفرادی طورپرخود ذمہ دار ہوں گے۔
پی ٹی اے کے مطابق صارفین پر لازم ہے کہ وہ تمام متعلقہ قواعد وضوابط کی پابندی کریں،قواعد کی خلاف ورزی کی صورت میں ضروری کارروائی عمل میں لائی جاسکتی ہے،صارفین ذمہ دارانہ طرزِعمل سے مواصلاتی نظام کے تحفظ،استحکام کیلئے موثر کردار ادا کریں۔