مذاکرات کی پیشکش ،نیشنل ڈائیلاگ کمیٹی کا اعلی حکومتی اورسیاسی شخصیات سے رابطوں کا فیصلہ

اسلام آباد (سب نیوز)وزیراعظم کی مذاکرات کی دعوت پراپوزیشن کی آمادگی،نیشنل ڈائیلاگ کمیٹی پھرسے متحرک ہوگئی۔ نیشنل ڈائیلاگ کمیٹی نے اعلی حکومتی اور سیاسی شخصیات سے رابطوں کا فیصلہ کیا ہے۔
فواد چوہدری کی سربراہی میں کمیٹی صدرمملکت، وزیراعظم، مولانا فضل الرحمان سے ملے گی،کمیٹی سیاسی رہنماوں کوکوٹ لکھپت جیل میں قیدپی ٹی آئی رہنماوں کی رہائی پرآمادہ کریگی،نیشنل ڈائیلاگ کمیٹی کے رکن فواد چوہدری نے وزیراعظم سے ملاقات کیلئے وقت مانگ لیا۔
فواد چوہدری کی جانب سے صدرمملکت سے ملاقات کیلئے ایوان صدر سے بھی رابطے کی کوششیں کی جارہی ہیں،فواد چوہدری نے کہا ہماری تحریک کو گزشتہ تین ہفتے میں ناقابل یقین کامیابی ملی ہے،سیاسی درجہ حرارت کم کرنے،ہم آہنگی فضا پیدا کرنے کیلئے سب سے ملیں گے، کمیٹی امیرجماعت اسلامی حافظ نعیم الرحمان اور پیر پگارا سے بھی ملاقات کریگی۔
فواد چوہدری نے مزید کہاملک کو سیاسی و معاشی بحرانوں سے نکالنے کیلئے اب ہرکوئی مذاکرات چاہتا ہے، مذاکرات اس وقت کامیاب ہوں گے جب پی ٹی آئی کے کوٹ لکھپت جیل میں قیدرہنما حصہ بنیں، کوشش ہے کوٹ لکھپت جیل میں قید رہنماوں کی فوری رہائی ہوتاکہ وہ مذاکرات کا حصہ بنیں ،ڈائیلاگ کے سوا اپوزیشن اور حکومت کے پاس کوئی آپشن نہیں۔