پاکستان نے سرکاری شعبے کے اکاونٹنگ نظام میں جامع اصلاحات کا آغاز کر دیا

اسلام آباد (سب نیوز) آڈیٹر جنرل آف پاکستان نے بین الاقوامی پبلک سیکٹر اکاونٹنگ اسٹینڈرڈز کے مطابق ایکروئل بنیادوں پر نئے اکاونٹنگ معیارات کی تیاری کا عمل شروع کر دیا،اصلاحات کا مقصد شفافیت، مالی نظم و ضبط اور پبلک فنانشل مینجمنٹ کو مضبوط بنانا ہے۔
اعلامیہ محکمہ آڈیٹر جنرل آف پاکستان کے مطابق آڈیٹر جنرل آف پاکستان نے آئینِ پاکستان کے آرٹیکل 170 کے تحت حاصل آئینی اختیار کو بروئے کار لاتے ہوئے ملک کے موجودہ نیو اکاونٹنگ ماڈل پر نظرثانی کا آغاز کیا، نئے اکاونٹنگ معیارات صدرِ پاکستان کی منظوری کے بعد نافذ کیے جائیں گے، موجودہ نیو اکاونٹنگ ماڈل 2000 میں متعارف کرایا گیا تھا، نقد بنیادوں پر قائم ہیاصلاحاتی عمل عالمی بینک کی تکنیکی معاونت سے کیا جا رہا ہے، اصلاحات کے تحت پاکستان میں پہلی بار سرکاری مالیاتی رپورٹنگ کو بین الاقوامی سطح پر تسلیم شدہ ایکروئل نظام سے ہم آہنگ کیا جائے گا۔
موجودہ اکاونٹنگ فریم ورک گزشتہ دو دہائیوں سے قومی مالیاتی نظام کی بنیاد رہا ہے ،بدلتے عالمی معیارات کے پیش نظر اسے مزید مضبوط اور جدید بنانے کی ضرورت تھی ،ایکروئل بنیادوں پر اکاونٹنگ نظام کی منتقلی سے حکومتی مالیاتی رپورٹنگ میں نمایاں بہتری آئے گی، محکمہ آڈیٹر جنرل آف پاکستان نئے نظام کے تحت اثاثہ جات، واجبات، آمدن اور اخراجات کی مکمل اور درست تصویر سامنے آئیگی، نئے اکاونٹنگ نظام سے مالیاتی معلومات کے معیار اور اعتماد میں بھی اضافہ ہوگا، نظرثانی شدہ اکاونٹنگ فریم ورک وفاقی، صوبائی اور مقامی حکومتوں پر یکساں طور پر لاگو ہوگا۔
محکمہ آڈیٹر جنرل کے مطابق نئے نظام سے پورے عوامی شعبے میں یکسانیت، تقابلیت اور مالی شفافیت کو فروغ ملے گا،اقدام سرکاری مالیاتی نظام کی جدید کاری، احتساب، شفافیت اور بہتر طرزِ حکمرانی کے لیے ادارے کے عزم کا واضح اظہار ہے،اصلاحات پاکستان کو عالمی سطح پر تسلیم شدہ مالیاتی معیارات سے ہم آہنگ کرنے کی جانب ایک اہم قدم ہیں۔