لاہور: (آئی پی ایس) صوبہ پنجاب کے کئی شہروں میں شدید دھند کی وجہ سے حدِ نگاہ کم ہونے پر موٹرویز مختلف مقامات سے بند کر دی گئیں۔
دھند کے باعث موٹروے ایم 2 لاہورسے کوٹ مومن تک، ایم 3 لاہور سے سمندری تک، جبکہ سیالکوٹ موٹروے ایم 11 بھی بند کر دی گئی، اس کے علاوہ موٹروے ایم 4 پنڈی بھٹیاں سے فیصل آباد تک بند ہے۔
موٹروے پولیس کے مطابق دھند میں محفوظ سفری اوقات صبح 10 تا شام 6 ہیں، قومی شاہراہ پر سندر، مانگا منڈی، پھول نگر اور پتوکی میں بھی دھند ہے، قومی شاہراہ پر حد نگاہ صفر سے 100 میٹر تک ہے۔
ادھر لاہور ایئرپورٹ پر پروازوں کا شیڈول جزوی طور پر متاثر ہے، لاہور سے بیرون ملک جانے والی معتدد پروازیں تاخیر کا شکار ہوگئیں۔
ایئرپورٹ ذرائع کے مطابق لاہور سے دبئی، سعودی عرب اور ابو ظہبی جانے والی پروازیں تاخیر کا شکار ہیں، لاہور سے کینیڈا جانے والی پی آئی اے کی پرواز میں بھی 7 گھنٹے سے زائد کی تاخیر ہو چکی۔
