دبئی، :زمبابوے کے لیجنڈری کرکٹر، تجربہ کار کوچ اور ڈی پی ورلڈ آئی ایل ٹی 20 کے معروف کمنٹیٹر اینڈی فلاور نے خلیجی خطے میں کرکٹ کو فروغ دینے اور عالمی معیار کے کھلاڑیوں کو ایک پلیٹ فارم پر اکٹھا کرنے میں لیگ کے اہم کردار کو سراہا ہے۔
اینڈی فلاورنے کہا کہ ڈی پی ورلڈ آئی ایل ٹی 20 ایک انقلابی ٹورنامنٹ بن کر سامنے آیا ہے۔ دنیا بھر کے بہترین کھلاڑی یہاں کھیل رہے ہیں ،نکولس پورن، کیرون پولارڈ، روماریو شیفرڈ، ٹام بینٹن اور جیمز ونس جیسے نام اس لیگ کی شان بڑھاتے ہیں۔اینڈی فلاور نے خلیجی ممالک میں کرکٹ کی ترقی کے لیے لیگ کی کوششوں کو بھی سراہا، خاص طور پر کویت اور سعودی عرب جیسے خطوں کے کھلاڑیوں کی شمولیت کو قابلِ تحسین قرار دیا۔
ان کے مطابق یہ لیگ صرف اعلیٰ معیار کی کرکٹ نہیں دکھا رہی بلکہ اس نے خطے میں کھیل کا دائرہ بڑھا کر معیار کو بھی بلند کیا ہے۔ یو اے ای کے کھلاڑیوں میں نمایاں بہتری آئی ہے۔انہوں نے نوجوان اماراتی کرکٹر آیان خان کی تعریف کرتے ہوئے کہا کہ وہ شاندار آل راؤنڈر ہیں جنہوں نے حال ہی میں سیزن 4 میں تین وکٹیں لے کر پلیئر آف دی میچ کا اعزاز حاصل کیا۔ اینڈی فلاور کے مطابق محمد وسیم اس وقت یو اے ای کے سب سے بہترین کھلاڑی ہیں اور عالمی فرنچائز ٹورنامنٹس میں اپنی جگہ بنانے کی پوری قابلیت رکھتے ہیں۔اپنے کمنٹری رول کے بارے میں بات کرتے ہوئے فلاور نے کہا کہ ڈی پی ورلڈ آئی ایل ٹی 20 میں کمنٹری کرنا مجھے کوچنگ کے دباؤ سے ہٹ کر کرکٹ سے جڑے رہنے کا موقع دیتا ہے۔ یہ کام میرے کیریئر میں ایک خوشگوار اور نیا تجربہ ہے۔‘‘ٹکٹوں کی فروخت:ڈی پی ورلڈ آئی ایل ٹی 20 سیزن 4 کے ٹکٹ ورجن میگاسٹور کے ٹکٹنگ پلیٹ فارم سے دستیاب ہیں۔
