نور مقدم قتل کیس:ملزمان کو ضمانت دینے کا فیصلہ چیلنج

اسلام آباد،نور مقدم قتل کیس میں تھراپی ورکس کے ملازمین اور مالک کی ضمانت منسوخی کی درخواست دائر کر دی گئی ۔تفصیلات کے مطابق جمعرات کو نور مقدم کے والد شوکت مقدم نے ملزمان کی ضمانت کی منسوخی کے لیے اسلام آباد ہائی کورٹ سے رجوع کیا ۔شوکت مقدم نے درخواست میں ایڈیشنل سیشن جج کے 6ملزمان کو ضمانت دینے کے فیصلہ کو چیلنج کیا ہے۔درخواست میں کہا گیا ہے کہ عدالت نے ضمانت دیتے وقت سپریم کورٹ کے طے کردہ قوانین کو نظر انداز کیا۔یہ ملزمان موقع واردات پر موجود تھے جبکہ ملزم امجد کے زخمی ہونے سے متعلق ہسپتال میں حقائق چھپائے گئے۔درخواست کے مطابق ملزمان شوکت مقدم کو دھمکا رہے ہیں۔ ضمانت منسوخ نہ کی گئی تو درخواست گزار کو ناقابل تلافی نقصان پہنچ سکتا ہے۔شوکت مقدم نے درخواست میں اسلام آباد ہائی کورٹ سے ایڈیشنل سیشن جج کافیصلہ کالعدم قرار دینے کی استدعا کی ہے۔انصاف کے تقاضے پورے کرنے کے لیے چھ ملزمان کی ضمانت منسوخ کی جائے۔دو روز قبل نور مقدم کیس میں تھراپی ورکس کے چیف ایگزیکٹو آفیسر طاہر ظہور سمیت چھ ملزمان کی ضمانت منظور ہو گئی تھی اور عدالت نے ملزمان کو پانچ پانچ لاکھ روپے کے مچلکے جمع کرانے کی ہدایت کی تھی۔خیال رہے کہ 20 جولائی کو سابق سفیر شوکت مقدم کی صاحبزادی نور مقدم کو اسلام آباد کے سیکٹر ایف سیون میں گلا کاٹ کر قتل کر دیا گیا تھا۔اس مقدمے کے مرکزی ملزم ظاہر جعفر اور اس کے والدین سمیت دیگر ملزمان کا نام ای سی ایل میں شامل ہے۔