اسلام آباد (سجاد ظہور بھٹی )سی ڈی اے کی تاریخ کا انوکھا فیصلہ ، بورڈ ممبران کی موجیں ہی موجیں، نئی گاڑیوں کیساتھ ساتھ ہر بورڈ میٹنگ پر چالیس ہزار روپے بھی مل رہا ہے ، وزیراعظم اخراجات کنٹرول کرنے کے دعوئوں پر بے بس ہو گئے ۔
سب نیوز کو دسیتاب بورڈ میٹنگز دستاویز کے مطابق کیپٹل ڈویلپمنٹ اتھارٹی کی دو جنوری 2025 کی بورڈ میٹنگ کے منٹس کے مطابق سی ڈی اے بورڈ ممبران کو ہر میٹنگ کا معاوضہ دیا جائے گا ، 2 جنوری 2025 کی میٹنگ میں تمام ایگریکٹو اور نان ایگزیکٹو ممبران کو معاوضہ دینے کی سمری ممبر ایڈمن طلعت محمود نے پیش کی ، ایجنڈا آئٹم نمبر 12181/1441/BM/25 بورڈ میں پیش کیا گیا جس میں یہ معاملہ اٹھایا گیا کہ 3 مارچ 2021 کو بورڈ نے فیصلہ کیا تھا کہ نان ایگزیکٹو ممبر ان کو معاوضہ دیا جائے تاہم ایگزیکٹو بورڈ ممبران کو بھی اس فارمولے کے مطابق بورڈ میٹنگ کا معاوضہ دیا جائے ،، اس ضمن میں این ایچ اے ، فیڈرل ہاوسنگ اتھارٹی ، ٹریڈ ڈویلپمنٹ اتھارٹی ، پاکستان ہاسنگ اتھارٹی ، سمیت متعدد اتھارٹیز کو بطور مثال پیش کیا گیا
تاہم ان تمام مثالوں کی روشنی میں بورڈ نے سی ڈی اے بورڈ کے تمام ممبران بشمول سیکرٹری سی ڈی اے بورڈ کو ہر میٹنگ کا 40000 معاوضہ دینے کی اجازت دیدی ، جبکہ بورڈ میٹنگز میں کسی بھی آفیسر کی شرکت پر اس آفیسر کو آٹھ ہزارروپے دیئے جائیں گے ۔ یاد رہے سی ڈی اے کی تاریخ میں یہ انوکھا کام موجود بورڈ نے سرانجام دیا ہے، ایگزیکٹو بورڈ ممبران پہلے ہی تمام سرکاری مراعات لے رہے ہیں ،کیا سرکاری خزانے کے اس طرز کے استعمال پر وزیر اعظم ، وزیر داخلہ ، وفاقی وزیر حنیف عباسی ،وفاقی وزیر طارق فضل چوہدری اس پر توجہ کریں گے ؟؟ کیا یہ اقدام وزیراعظم کی سادگی مہم کے منافی نہیں ؟۔
