اسلام آباد (سب نیوز )وفاقی وزیر داخلہ اینڈ اینٹی نارکوٹکس محسن نقوی کی ہدایت اور چیئرمین سی ڈی اے، چیف کمشنر اسلام آباد اور ڈی جی سول ڈیفنس محمد علی رندھاوا اور کی سربراہی پر اسلام آباد بلڈنگ کنٹرول ریگولیشنز 2020 (ترمیم شدہ 2023) کے تحت اسلام آباد بھر میں غیرمجاز تعمیراتی سرگرمیوں کے خاتمے کیلئے سی ڈی اے کے ڈائریکٹوریٹ جنرل بلڈنگ اینڈ ہاسنگ کنٹرول (بی اینڈ ایچ سی) نے اسلام آباد کیپٹل ٹیریٹری (آئی سی ٹی) کے زون-5 میں ایک بڑا سیلنگ آپریشن کیا۔ یہ آپریشن بی اینڈ ایچ سی نے انفورسمنٹ، آئی سی ٹی انتظامیہ اور پولیس کے تعاون سے کیا۔
آپریشن کے دوران زون-5 میں واقع وسنہ پیلیس مارکی کو بلڈنگ پلانز کی غیر منظوری اور تعمیراتی ضوابط کی خلاف ورزی پر سیل کر دیا گیا۔ جناح گارڈنز سوسائٹی (فیچز) کے توصیف کمرشل اور شاہین کمرشل بلاکس میں زیر تعمیر 14 غیرمنظور شدہ اور غیرقانونی کمرشل انفراسٹرکچر کو سیل کیا گیا۔ جاپان روڈ کے کنارے زیر تعمیر 2 اضافی عمارتوں کو متعلقہ بلڈنگ بائی لاز کی پاسداری نہ کرنے پر سیل کر دیا گیا۔ علاوہ ازیں، جاپان روڈ کے قریب ہی خلاف ورزی کرنے والوں کو 3 اسٹاپ ورک اور ریگولرائزیشن نوٹسز بھی جاری کئے گئے۔ یہ کارروائیاں بلڈنگ پلانز جمع نہ کروانے، غیرمجاز کمرشل سرگرمیوں اور سی ڈی اے کی لازمی فیسز و جرمانوں کی ادائیگی نہ کرنے کی وجہ سے ضوابط کی خلاف ورزی پر عمل میں لائی گئیں۔
بی اینڈ ایچ سی کی ٹیموں نے آئی سی ٹی پولیس کے سیکورٹی کور اور مجسٹریٹ آئی سی ٹی کی قانونی نگرانی میں قانونی کارروائی کرتے ہوئے سرکاری سیلنگ اور انتباہی نوٹسز لگائے، نیز زیر تعمیر جگہوں کو محفوظ کر دیا۔ واضح رہے سی ڈی اے غیر قانونی تعمیرات کے خلاف زیرو ٹالرنس پالیسی کو دہراتی رہے گی اور اس سلسلے میں شہریوں، بلڈرز اور ڈویلپرز سے اپیل کرتی ہے کہ وہ ضروری منظوریوں کے بغیر تعمیراتی کام شروع کرنے سے گریز کریں۔ تمام اسٹیک ہولڈرز کو آگاہ کیا جاتا ہے کہ وہ کسی بھی جائیداد کی خریداری یا سرمایہ کاری سے قبل اس کی منظوری کی قانونی حیثیت کی تصدیق کر لیں۔ سی ڈی اے منصوبہ بند ترقی اور قانونی پاسداری کے مفاد میں آئی سی ٹی بھر میں ایسے ایکشنزجاریرکھے گی۔
