پی ٹی آئی کا سابق فاٹا میں ٹیکس کے نفاذ کی صورت میں بھرپور مزاحمت کا اعلان

اسلام آباد (سب نیوز)پاکستان تحریک انصاف نے سابق فاٹا میں ٹیکس کے نفاذ کے خلاف بھرپور مزاحمت کا اعلان کیا ہے۔
پارلیمنٹ ہاوس کے باہر میڈیا سے گفتگو کرتے ہوئے سابق اسپیکر قومی اسمبلی اسد قیصر نے کہا کہ ٹیکس کے نفاذ سے قبل حکومت کو خطے میں امن و امان قائم کرنے اور کاروباری مواقع فراہم کرنے چاہئیں۔انہوں نے زور دیا کہ قیام امن نہ صرف صوبائی بلکہ وفاقی حکومت کی بھی ذمہ داری ہے۔اسد قیصر نے کہا کہ ہمیں امن دو، کاروبار کا موقع دو، پھر ہم ٹیکس دیں گے۔
پی ٹی آئی خیبر پختونخوا کے صدر جنید اکبر نے کہا کہ ضم شدہ اضلاع کے منتخب نمائندوں سے اب بھی بھتہ مانگا جاتا ہے جو خطے میں بدامنی کی عکاسی کرتا ہے۔انہوں نے کہا کہ حکومت نے سابق فاٹا کے لیے ہر سال 100 ارب روپے خرچ کرنے کا وعدہ کیا تھا جو پورا نہیں کیا گیا۔ جنید اکبر نے خبردار کیا کہ ٹیکس کے نفاذ اور بدامنی کے خلاف پی ٹی آئی اسمبلی کے اندر آواز اٹھائے گی اور سڑکوں پر احتجاج بھی کیا جائے گا۔