اسلام آباد: چیئرمین قومی احتساب بیورو (نیب) لیفٹیننٹ جنرل (ر) نذیر احمد بٹ نے پارلیمنٹ ہاؤس میں اسپیکر قومی اسمبلی سردار ایاز صادق سے ملاقات کی اور نیب کی سالانہ رپورٹ 2023-24 پیش کی۔
اسپیکر قومی اسمبلی نے نیب کی جانب سے 5311 ارب روپے کی تاریخی ریکوری پر ادارے کو خراجِ تحسین پیش کرتے ہوئے اسے نیب کی غیرجانبداری اور مؤثر کارکردگی کا مظہر قرار دیا۔ انہوں نے کہا کہ نیب کی بے مثال کارکردگی ادارے کی شفافیت اور احتساب کے عزم کی عکاسی کرتی ہے۔
ملاقات میں اسپیکر نے نیب میں جاری کفایت شعاری، ڈیجیٹل تبدیلی اور مصنوعی ذہانت (AI) کے ذریعے شفاف تحقیقات کے اقدامات پر اطمینان کا اظہار کیا، جبکہ شکایات کے ازالے کیلئے سہولت کاری اقدامات کو بھی سراہا۔
اسپیکر ایاز صادق نے نیب دفاتر میں شہریوں کے ساتھ عزت و احترام سے پیش آنے کے لیے قائم کیے گئے “اسپیشل اکاؤنٹیبلٹی ڈیسک” کے قیام کو خوش آئند قرار دیا۔
چیئرمین نیب نذیر احمد بٹ نے ادارے کو ایک ماڈل احتسابی ادارہ بنانے کے عزم کا اعادہ کرتے ہوئے کہا کہ نیب کو کاروبار فرینڈلی بنانے کے لیے خصوصی اقدامات کیے گئے ہیں۔ انہوں نے اس عزم کا اعادہ کیا کہ نیب کاروباری برادری کے اعتماد میں اضافہ کرے گا تاکہ پاکستان کو معاشی اور اقتصادی ترقی کی راہ پر گامزن کیا جا سکے۔
